18.02.2026 | 23:28
Ստեփանծմինդա-Լարս ավտոճանապարհը փակ է
Թուրքիան ինքնաթիռներով զենք է ուղարկել Պակիստան՝ Հնդկաստանի հետ լարվածության աճի ֆոնին
Քաղաքականություն
28.04.2025 | 13:40
Քաշմիրում Փահալգամի ահաբեկչական հարձակումից հետո Հնդկաստանի և Պակիստանի միջև լարվածության աճի ֆոնին Թուրքիան ռազմական տեխնիկա է ուղարկել Իսլամաբադին: Կիրակի Կարաչի է ժամանել Թուրքիայի ռազմաօդային ուժերի C-130 Hercules ռազմական տրանսպորտային ինքնաթիռը՝ տեղափոխելով տեխնիկա, գրում է Hindu Post-ը։
Ըստ լրատվամիջոցի աղբյուրների՝ Թուրքիայի այս քայլը երկու երկրների միջև ավելի լայն պաշտպանական համագործակցության մաս է կազմում: Միաժամանակ, ըստ որոշ տեղեկությունների, Իսլամաբադի ռազմական բազայում էլ վայրէջք են կատարել վեց թուրքական C-130 ինքնաթիռներ։
Թուրքական և պակիստանյան աղբյուրները հաստատել են ռազմական բեռի տեղափոխումը, սակայն բեռի մանրամասները չեն հրապարակվել։
Հնդկական լրատվամիջոցը գրում է, որ Թուրքիան Պակիստանի կողքին է այն ժամանակ, երբ տարածաշրջանային անկայունությունը մեծանում է, հատկապես, Փահալգամում տեղի ունեցած ահաբեկչական հարձակումից և Քաշմիրի շուրջ Հնդկաստան-Պակիստան հակամարտությունից հետո։ Թուրքիայի կողմից Պակիստանին տրամադրվող ռազմական օգնությունը լրացնում է Չինաստանի նմանատիպ օգնությունը, որը, ըստ որոշ տեղեկությունների, անօդաչու թռչող սարքեր է տրամադրել պաշտպանական կարողությունները բարելավելու համար։
Ինքնաթիռների թռիչքի մասին վկայում են նաև Flightradar-ի տվյալները։
Հիշեցնենք, որ Հնդկաստանի և Պակիստանի միջև տասնամյակներ շարունակվող հակամարտությունը սրվել է այն բանից հետո, երբ ապրիլի 22-ին Հնդկաստանի Փահալգամ զբոսաշրջային քաղաքում զինյալների խմբի կողմից իրականացված հարձակման հետևանքով սպանվել է 26 մարդ։ Զոհվածների մեծ մասը զբոսաշրջիկներ են։ Հարձակման պատասխանատվությունը ստանձնել է Պակիստանի կողմից աջակցվող Դիմադրության ճակատ (TRF) ապստամբական խմբավորումը, որը Հնդկաստանում համարվում է ահաբեկչական։ Իսլամաբադը, իր հերթին, հերքում է հարձակմանն իր մասնակցությունը։
Հարձակումից հետո Հնդկաստանի իշխանությունները հրամայել էին Պակիստանի բոլոր քաղաքացիներին լքել երկիրը մինչև ապրիլի 29-ը, նույնիսկ եթե նրանք այդ ամսաթվին վավեր վիզաներ ունեն։ Բացի այդ, Հնդկաստանի կառավարությունը հրամայել էր անհապաղ կասեցնել Պակիստանի հետ ջրային ռեսուրսների բաժանման մասին համաձայնագրի՝ 1960 թվականի Ինդոսի ջրերի մասին պայմանագրի գործողությունը։
Ի պատասխան՝ Իսլամաբադը նշել էր, որ Հնդկաստանի կողմից հարևանի ջրամատակարարումը դադարեցնելու ցանկացած փորձ կհամարի «պատերազմական ակտ», նաև հայտարարել դիվանագիտական միջոցների կիրառման մասին։
Թարգմանությունը՝ Էմմա Չոբանյանի
