Ադրբեջանի Կովկասի մահմեդականների վարչությունը Երևանում «մասնաճյուղ» է ստեղծել ու ղեկավար նշանակել

Ադրբեջանում Կովկասի մահմեդականների վարչությունը նիստ է հրավիրել՝ նվիրված, իբր, Երևանում մահմեդական համայնքի հետ կապված «մասնաճյուղի»՝ ղազիյաթի (համարժեք են քրիտոնեական թեմերին) ստեղծմանը։ Ադրբեջանական լրատվամիջոցների հաղորդմամբ՝ նիստին մասնակցել են Կովկասի մահմեդականների վարչության  նախագահ Ալլահշուքյուր Փաշազադեն, Ղազիների խորհրդի անդամները, Ադրբեջանի կրոնական կազմակերպությունների հետ աշխատանքի պետական ​​կոմիտեի ներկայացուցիչները, ինչպես նաև Միլլի Մեջլիսի պատգամավորներ:

Փաշազադեն հայտարարել է, թե այդ հաստատությունը Երևանում, իբր, «վերականգնվում է, ոչ թե ստեղծվում, քանի որ գործել է ցարական Ռուսաստանի ժամանակ և վերացվել խորհրդային տարիներին»։

Ադրբեջանական կողմի հաղորդմամբ՝ «Երևանի ղազիի» պաշտոնում ընտրվել է Բահթիյար Նաջաֆովը։

Ադրբեջանի պատմական կեղծարարությունները նոր մակարդակի հասցնելով՝ Փաշազադեն հայտարարել  է, թե Էջմիածինն «ադրբեջանական պատմական հող է»։

«Փաստն այն է, որ հայկական կրոնական շրջանակները բնակություն են հաստատել Ուչմիաձինում՝ պատմական ադրբեջանական հողերում, որոնք նրանք անվանել են Էջմիածին, և իրենց կրոնական տաճարները կառուցել են այն տարածքներում, որոնք իրենց հետ ոչ մի կապ չունեին»,- ասել է նա։

Նախօրեին էլ Ադրբեջանի նախագահ Իլհամ Ալիևը, շարունակելով Հայաստանին տարածքային պահանջներ ներկայացնել, ասել էր, թե «ՀՀ-ն պետք է հստակ դիրքորոշում հայտնի՝ երբ և ինչ պայմաններում արևմտյան ադրբեջանցիները կկարողանան վերադառնալ իրենց  հողեր»։

Թարգմանությունը՝ Էմմա Չոբանյանի