Նեպալի Էվերեստ լեռան շրջանում երկու ուղղաթիռ է բախվել․ առնվազն մեկ մարդ զոհվել է, ևս երկուսը՝ վիրավորվել

Նեպալի Էվերեստ լեռան շրջանում երկու ուղղաթիռ է բախվել, ինչի հետևանքով առնվազն մեկ մարդ զոհվել է, ևս երկուսը՝ վիրավորվել, գրում է Al Jazeera-ն։

Վթարը տեղի է ունեցել երեքշաբթի, երբ երկուսն էլ փորձում էին վայրէջք կատարել Էվերեստի բազային ճամբարից փոքր-ինչ ներքև գտնվող տարածքում։ Էվերեստը ծովի մակարդակից աշխարհի ամենաբարձր լեռն է։

Համացանցում հրապարակված տեսանյութում երևում է, թե ինչպես են ավելի քան մեկ տասնյակ մարդիկ փորձում փրկվել, երբ բախումից հետո ուղղաթիռներն ընկնում են գետնին։ Իշխանությունները հաստատել են, որ զոհվածը Հնդկաստանի 47-ամյա քաղաքացի է։ Վիրավորվել են Նոր Զելանդիայի քաղաքացին և նեպալցի օդաչուն։ Հայտնի չէ, թե ընդհանուր առմամբ քանի մարդ է եղել երկու ուղղաթիռներում։Վթարը տեղի է ունեցել Ֆերիչե գյուղում՝ ծովի մակարդակից 4 200 մետր բարձրության վրա։

Էվերեստի շրջանը դժվարանցանելի է, քանի որ այնտեղ ճանապարհներ չկան։ Ուղղաթիռները պարբերաբար օգտագործվում են այն զբոսաշրջիկներին և լեռնային ուղեկցորդներին տարհանելու համար, որոնք հիվանդության կամ ուժասպառության պատճառով ստիպված են լինում ընդհատել իրենց արշավը։ Լեռան վրա ջերմաստիճանը մշտապես զրոյից ցածր է։

Անցյալ շաբաթ Էվերեստի բազային ճամբար տանող ճանապարհին գտնվող հյուրանոցներից մեկում հրդեհ էր բռնկվել։ Ուժեղ ձյունը դժվարացրել էր կրակը մարելու աշխատանքները։ Հրդեհի հետևանքով զոհերի կամ տուժածների մասին տեղեկություններ չէին հաղորդվել։

Թարգմանությունը՝ Էմմա Չոբանյանի