08.09.2026 | 17:22
Հայկական ճարտարապետության նոր հասցեն․ Amanoo-ի միջազգային ճանապարհը
PKK-ի որոշ խմբեր դիմադրում են զինաթափման և լուծարման Օջալանի կոչին. Hurriyet
Քաղաքականություն
01.04.2025 | 21:21
Ակնկալվում է, որ Քուրդիստանի աշխատավորական կուսակցությունն (PKK) ապրիլի կեսերին համագումար կանցկացնի, որտեղ զինաթափման և ինքնալուծարման մասին պաշտոնական որոշում կկայացնի՝ քրդերի բանտարկված առաջնորդ Աբդուլլահ Օջալանի կոչից հետո։ Թուրքական իշխանամերձ Hurriyet-ի սյունակագիր Աբդուլքադիր Սելվին, սակայն, գրում է, որ երկու ներքին խմբեր կարող են դիմակայել այս քայլին:
«Ես չեմ ցանկանում խաթարել գործընթացը, բայց ասվում է, որ PKK-ի զինաթափման որոշմանը դեմ կարող են հանդես գալ երկու խմբակցություններ, մեկը՝ Իրանի հետ կապված, իսկ մյուսը՝ Դերսիմի խմբավորումը»,- գրում է նա։
Սելվին ընդգծել է, որ PKK-ի ներսում ցանկացած ընդդիմություն կհամարվի անհնազանդություն կուսակցության հիմնադրի դեմ:
«Եթե Քանդիլում ոմանք դիմադրեն զինաթափման որոշմանը, ապա կդիմադրեն հենց Օջալանին»,- նշում է լրագրողը՝ հավելելով, որ եթե PKK-ի համագումարն ընդունի զինաթափման որոշումը, իսկ թևերից մեկը դեմ լինի դրան, «խմբակցությունը կկանգնի PKK-ի և նրա հիմնադիր կամքի դեմ»։
Լրագրողը եզրակացնում է, որ դիմադրողները պետք է բախվեն հետևանքների։ Նա նշում է նաև, որ ներկայիս աշխարհաքաղաքական մթնոլորտն անբարենպաստ է PKK-ի համար։ Մասնավորապես, խմբի գործառնական կարողությունները Թուրքիայի ներսում զգալիորեն նվազել են, Սիրիայի նոր կառավարությունը պայմանագրեր է կնքել PKK-YPG կառույցի հետ, Թուրքիան վերահսկում է 30-40 կմ-անոց գոտի Հյուսիսային Իրաքում։
Բացի այդ, հաղորդվում է, որ ԱՄՆ-ի աջակցությունը PKK-YPG-ին նվազում է, քանի որ Վաշինգտոնը ճնշում է խմբավորմանը՝ մղելով Դամասկոսի հետ հաշտեցման, եվրոպական երկրները գնալով ավելի են կենտրոնանում ներքին հարցերի վրա, Իրանի տարածաշրջանային ազդեցությունը նվազել է։
«Թուրքիան այժմ ունի ռազմավարական առավելություն։ Սա անցյալի Թուրքիան չէ, և տարածաշրջանը փոխվել է: Իշխանության դինամիկան ձեռնտու է Թուրքիային»,- գրում է Սելվին։
Հիշեցնենք, որ ավելի վաղ Աբդուլլահ Օջալանը PKK-ին զենքերը վայր դնելու և լուծարվելու կոչ էր արել։
Թարգմանությունը՝ Էմմա Չոբանյանի
