29.07.2026 | 10:44
Պատգամավորի թեկնածու Արա Նախշքարյանը ձերբակալվել է ընտրակաշառքին առնչվող գործի շրջանակներում
ԱԱ․ Բաչկովը հաղթել է ժամկետից շուտ, Մաշակարյանը և Հովհաննիսյանը ևս շարժվում են առաջ
05.12.2025 | 23:32
Դուբայում մեկնարկած աշխարհի առաջնության երկրորդ մրցումային օրը հաջող էր Հայաստանի հավաքականի համար։ Եվս 3 հայ բռնցքամարտիկ հաղթահարել է մեկնարկային փուլի արգելքը։
Տոկիոյի Օլիմպիական խաղերի բրոնզե մեդալակիր, Եվրոպայի եռակի չեմպիոն, աշխարհի առաջնության քառակի բրոնզե մեդալակիր Հովհաննես Բաչկովը (67 կգ) ժամանակից շուտ հաղթել է Քենիան ներկայացնող Վիսման Միվատեին։ Բաչկովի մրցակիցը մի քանի անգամ նոկդաունում է հայտնվել, ինչից հետո մրցավարը դադարեցրել է մենամարտը։
67 կգ քաշային կարգում Հայաստանի մյուս ներկայացուցիչ Արմեն Մաշակարյանին հաղթանակ է շնորհվել առանց պայքարի՝ մրցակցի չներկայանալու պատճառով:
Հաղթանակով է մեկնարկել նաև Արտուշ Հովհաննիսյանը (80 կգ), որն առավելության է հասել կամերունցի Նգոնա Բրանդոնեի նկատմամբ։
Դեկտեմբերի 4-ին առաջին փուլի արգելքը հաղթահարել էին նաև Արարատ Հարությունյանը (71 կգ), Վախթանգ Հարությունյանը (75 կգ) և Նարեկ Մանասյանը (92 կգ)։
Հայաստանի հավաքականն ԱԱ-ին մասնակցում է 14 բռնցքամարտիկով։ Աշխարհի առաջնությունը կավարտվի դեկտեմբերի 13-ին, 13 քաշային կարգում մասնակցում է 108 երկրի 428 բռնցքամարտիկ։ Մրցանակային հիմնադրամը ռեկորդային 8 միլիոն դոլար է։ Աշխարհի չեմպիոնները կստանան 300 հազար դոլար, փոխչեմպիոնները՝ 150 հազար, բրոնզե մեդալակիրները՝ 75 հազար, իսկ 5-րդ տեղ գրաված բռնցքամարտիկները՝ 10 հազար։
