ՀՀ-ին և Արցախին աջակցած Ռոբերտ Քենեդի կրտսերը հաստատվել է ԱՄՆ առողջապահության նախարարի պաշտոնում

Ռոբերտ Քենեդի կրտսերը՝ ԱՄՆ նախագահ Դոնալդ Թրամփի կաբինետի ամենահակասական անդամներից մեկը, երդվել է որպես երկրի առողջապահության և մարդկային ծառայությունների հաջորդ նախարար, գրում է BBC-ն։

Լրատվամիջոցը նշում է, որ ԱՄՆ նախագահի նախկին թեկնածուն այժմ վերահսկելու է առանցքային առողջապահական գործակալությունները՝ մոտ 80,000 աշխատողներով և տրիլիոն դոլար բյուջեով: Օրենսդիրները կասկածի տակ էին դնում նրա առողջապահական անհիմն պնդումները և պատվաստանյութերի հանդեպ թերահավատությունը:

Նախօրեին Քենեդին թեկնածությունը հաստատվել է ձայների 52 կողմ և 48 դեմ հարաբերակցությամբ: Ոչ մի դեմոկրատ նրան չի աջակցել։ Սենատի մեծամասնության նախկին առաջնորդ Միթչ Մաքքոնելը միակ հանրապետականն է, որը դեմ է քվեարկել Քենեդի կրտսերին: Նա նախարարների կաբինետի վերջին նշանակված անձն է։

Քենեդին այժմ վերահսկելու է այնպիսի գործակալություններ, ինչպիսիք են Հիվանդությունների վերահսկման և կանխարգելման կենտրոնները (CDC), Սննդի և դեղերի վարչությունը (FDA), Առողջապահության ազգային ինստիտուտը (NIH) և Medicare ու Medicaid ծառայությունների կենտրոնները։

Հավելենք, որ Քենեդի կրտսերը սենատոր Ռոբերտ Քենեդիի որդին և 60 տարի առաջ սպանված ԱՄՆ նախագահ Ջոն Քենեդիի եղբորորդին է։ Նա 2024 թվականի նախագահական մրցապայքարին մասնակցում էր որպես անկախ թեկնածու, սակայն օգոստոսին դուրս էր մնացել ընտրապայքարից և հայտարարել Թրամփին պաշտպանելու մասին: Քենեդի կրտսերը քննադատության է ենթարկվել իր հակապատվաստանյութային դիրքորոշման համար և մեղադրվել COVID-19-ի ժամանակ պատվաստանյութերի անվտանգության ու արդյունավետության մասին դավադրության տեսություններ տարածելու մեջ:

Հավելենք, որ դեռևս նախագահի անկախ թեկնածու լինելու ընթացքում քարոզարշավի ժամանակ նա հայտարարել էր, որ իր վարչակազմը կաջակցի Հայաստանին և Արցախին։ 2023 թվականի դեկտեմբերին X-ի միկրոբլոգում հրապարակված տեսաուղերձում Քենեդին հայտարարել էր, որ ևս «մեկ պատերազմ կանխելու և ազատության ու ժողովրդավարության սկզբունքները պաշտպանելու համար ԱՄՆ կառավարությունը պետք է մոբիլիզացնի տարածաշրջանային աջակցությունը հայերի ինքնապաշտպանության և ինքնորոշման իրավունքին և պաշտպանի արցախահայության անվտանգ վերադարձն իրենց պատմական հայրենիք»։

Նա նշել էր, որ Ադրբեջանը հարձակման է անցել և տեղահանել ամբողջ 120 հազար հայ բնակչությանը։ Անցյալ տարի ապրիլին էլ նա սոցցանցում գրառմամբ հարգանքի տուրք էր մատուցել Հայոց ցեղասպանության զոհերի հիշատակին և հայտարարել, որ «պետք է գործել հիմա՝ Ադրբեջանին պատասխանատվության ենթարկելու համար՝ կոչ անելով ազատ արձակել պատանդներին և կիրառել պատժամիջոցներ՝ մինչև բնիկ հայերի Արցախ վերադարձի ապահով ու կենսունակ ճանապարհին հասնելը»։

Թարգմանությունը՝ Էմմա Չոբանյանի