«Մենք գնահատում ենք մարդկանց կյանքը, ոչ թե շքերթները»․ Զելենսկին ավելի երկարատև հրադադար է առաջարկում

«Ուկրաինայի և Ռուսաստանի միջև հրադադարը մինչև մայիսի 8-ը հետաձգելու որևէ պատճառ չկա միայն նրա համար, որ Վլադիմիր Պուտինը կարողանա լռություն ապահովել «Հաղթանակի օրվա» շքերթի ժամանակ»,- ՌԲԿ Ուկրաինայի փոխացմամբ՝ այս մասին երեկոյան ելույթում ասել է Ուկրաինայի նախագահ Վլադիմիր Զելենսկին։ Նա հիշեցրել է, որ  ռուսական կողմը «Շահեդներ»-ով հարվածել է Չերկասիի մարզի քաղաքացիական ենթակառուցվածքներին։

«Այսինքն՝ ամեն նոր օրը նոր, հստակ ապացույց է այն բանի, որ Ռուսաստանի վրա ճնշում է պետք, և նկատելի ճնշում, որպեսզի նրանք՝ Մոսկվայում, ստիպված լինեն դադարեցնել այս պատերազմը՝ պատերազմ, որը միայն Ռուսաստանին է պետք», -ասել է  նա՝ ուշադրություն հրավիրելով, որ Ուկրաինան դեռևս պատրաստ է հնարավորինս արագ աշխատել բոլոր այն գործընկերների հետ, որոնք կարող են օգնել խաղաղության հաստատմանը և անվտանգության երաշխավորմանը։ Եվ մարտի 11-ին երկիրը համաձայնել է ամերիկյան առաջարկին՝ լիակատար հրադադարի վերաբերյալ։

Կիևը նաև առաջարկել է Մոսկվային դադարեցնել քաղաքացիական թիրախների վրա հարձակումները կամ երկարաձգել Զատկի «հրադադարը» առնվազն 30 օրով, սակայն Ռուսաստանը մերժել է այս գաղափարները։

«Հիմա կրկին մանիպուլյացիայի հերթական փորձն է՝ չգիտես ինչու բոլորը պետք է սպասեն մինչև մայիսի 8-ը և միայն այդ դեպքում դադարեցնեն կրակը՝ Պուտինին լռություն ապահովելու համար շքերթի ժամանակ։ Մենք գնահատում ենք մարդկանց կյանքերը, ոչ թե՝ շքերթները։ Հենց դրա համար մենք համարում ենք, աշխարհը համարում է, որ չկա պատճառ սպասելու մայիսի 8-ին։ Եվ կրակը պետք է դադարեցվի ոչ թե մի քանի օրով, հետո կրկին սպանելու համար»,-նշել է Զելենսկին։

Ըստ նրա՝ միայն առնվազն 30-օրյա լիակատար և անվերապահ հրադադարը կարող է հիմք հանդիսանալ իրական դիվանագիտության համար։

«Ռուսաստանը գիտի, թե ինչ անել և ինչպես արձագանքել. կրակն իրականում դադարեցնել։Եվ մենք կարծում ենք, որ աշխարհի ճնշումը, Ամերիկայի Միացյալ Նահանգների ճնշումը կարող են Ռուսաստանին մղել անհրաժեշտ արձագանքի», – հավելել է Ուկրանիայի նախագահը։

Հիշեցնենք, որ Կրեմլը նախօրեին հայտարարել էր, որ  ՌԴ նախագահ Վլադիմիր Պուտինի որոշմամբ, մարդասիրական նկատառումներից ելնելով՝ Հաղթանակի 80-ամյակի օրերին՝ մայիսի 7-8-ի կեսգիշերից մինչև մայիսի 10-11-ի կեսգիշերը, ռուսական կողմը հրադադար է հայտարարում։

Սպիտան տունն էլ հայտարարել էր, որ ԱՄՆ նախագահ Դոնալդ Թրամփը  պահանջում է մշտական, այլ ոչ թե ժամանակավոր հրադադար Ուկրաինայում։

Թարգմանությունը՝ Էմմա Չոբանյանի