13.01.2026 | 12:45
ՀՅԴ-ն 2026-ի ընտրություններին մասնակցելու է դաշինքով. Իշխան Սաղաթելյան․ ՏԵՍԱՆՅՈՒԹ
Պուտինը Հաղթանակի 80-ամյակի օրերին հրադադար է հայտարարել
Քաղաքականություն
28.04.2025 | 16:17
Ռուսական զորքերը մայիսի 8-ի կեսգիշերից մինչև մայիսի 11-ի կեսգիշերը կդադարեցնեն բոլոր ռազմական գործողությունները՝ ի պատիվ Հայրենական մեծ պատերազմում Խորհրդային Միության հաղթանակի 80-ամյակի։ Այս մասին հայտարարել է Կրեմլը։
«Ռուսաստանի Դաշնության զինված ուժերի գերագույն գլխավոր հրամանատար Վլադիմիր Պուտինի որոշմամբ, մարդասիրական նկատառումներից ելնելով, Հաղթանակի 80-ամյակի օրերին՝ մայիսի 7-8-ի կեսգիշերից մինչև մայիսի 10-11-ի կեսգիշերը, ռուսական կողմը հայտարարում է հրադադարի մասին։ Այս ժամանակահատվածում բոլոր ռազմական գործողությունները կդադարեցվեն»,- ասվում է ՌԴ նախագահի աշխատակազմի կողմից տարածված հայտարարության մեջ։
Կրեմլը կարծում է, որ Ուկրաինան «պետք է հետևի այդ օրինակին»։ Այնուամենայնիվ, նշվում է, որ եթե հրադադարը խախտվի ուկրաինական կողմից, Ռուսաստանի զինված ուժերը «համարժեք և արդյունավետ պատասխան կտան»։
«Ռուսական կողմը կրկին հայտարարում է իր պատրաստակամության մասին՝ առանց նախապայմանների խաղաղ բանակցությունների, որոնք ուղղված են ուկրաինական ճգնաժամի սկզբնական պատճառների վերացմանը, և միջազգային գործընկերների հետ կառուցողական փոխգործակցությանը»,- ասվում է հայտարարության մեջ։
Հիշեցնենք, որ Վլադիմիր Պուտինն ավելի վաղ հայտարարել էր, այսպես կոչված, Զատկի հրադադարի մասին, որն ուժի մեջ էր ապրիլի 19-ից 21-ը։ Ի պատասխան՝ Ուկրաինայի նախագահ Վլադիմիր Զելենսկին առաջարկել էր երկարաձգել հրադադարը ևս 30 օրով, եթե Ռուսաստանն իսկապես պատրաստ է լիակատար և անվերապահ լռության ձևաչափի։ Դրանից հետո Մոսկվան և Կիևը միմյանց մեղադրեցին Զատկի հրադադարը բազմիցս խախտելու մեջ։
Թարգմանությունը՝ Էմմա Չոբանյանի
