Ինչ ունեցվածք է հայտարարագրել ԱԺ պատգամավոր Տիգրան Աբրահամյանը

ԱԺ «Պատիվ ունեմ» խմբակցության քարտուղար, ՀՀԿ գործադիր մարմնի անդամ Տիգրան Աբրահամյանը Կոռուպցիայի կանխարգելման հանձնաժողով է ներկայացրել 2024 թվականի գույքի և եկամուտների հայտարարագիրը․ ըստ այդմ՝ նա ունի Երևանում 2017-ին գնված 1 բնակարան, վարում է 2023-ին գնված NISSAN ավտոմեքենա։ Աբրահամյանի բանկային ավանդի չափը չի փոխվել՝ 6․2 մլն դրամ է, բանկային 2 հաշիվներին ունեցել է մոտ 4 մլն դրամ, իսկ կանխիկ՝ 1․2 մլն դրամ։

Տիգրան Աբրահամյանի եկամուտը 1 տարում ավելացել է 630 հազար դրամով և կազմել 10․8 մլն դրամ։ Այս աճը հիմնականում Ազգային ժողովի աշխատավարձի բարձրացման արդյունք է, մասնավորապես՝ 2023-ի համեմատ 2024-ին նա ստացել է 653 հազար դրամով ավելի՝ 9․5 մլն դրամ աշխատավարձ, Ռուս-հայկական (Սլավոնական) համալսարանից՝ 415 հազար դրամ աշխատավարձ, «Այ դի բանկից» փոխառության դիմաց տոկոսավճար՝ 333 հազար դրամ, իսկ ահա ՊԵԿ-ից հիփոթեքային վարկի եկամտահարկի վերադարձի գումարը նվազել է 24 հազարով՝ կազմելով 644 հազար դրամ։ Նրա վարկի մայր գումարի մնացորդը նույնպես նվազել է՝ մոտ 15 հազար դրամով, և տարեվերջին կազմել 6․6 մլն դրամ։Տիգրան Աբրահամյանը «Հենակետ» վերլուծական կենտրոնի համահիմնադիրն է։

Պատգամավորի կինը՝ Գոհար Քոչարյանը, ի տարբերություն ամուսնու, նոր ձեռքբերում ունի՝ բնակարան։ Այդ նպատակով նա 2024-ին «Այ Դի բանկից» 15․3 մլն դրամ հիփոթեքային վարկ է վերցրել, որի մայր գումարի մնացորդը տարեվերջին եղել է 15 մլն դրամ։

Ընդդիմադիր պատգամավորի կինը շարունակում է աշխատել Վիգեն և Վահե Բադալյաններին պատկանող «Սոֆթ Կոնստրակտ» ընկերությունում՝ որպես տեխնիկական հրապարակումների մասնագետ։ Բացի համատեղ բնակարանից նա հայտարարագրել է նաև 4 հողամաս Լոռու Բովաձոր համայնքում։

2024-ին Գոհար Քոչարյանը «Սոֆթ Կոնստրակտ»-ից ստացել է 6․7 մլն դրամ աշխատավարձ, ՊԵԿ-ից՝ 1․4 մլն դրամ հիփոթեքի եկամտահարկի վերադարձ, «Այ Դի բանկից»՝ 560 հազար դրամ փոխառության դիմաց տոկոսավճար։ Քոչարյանի բանկային հաշվին տարեվերջի դրությամբ եղել է 670 հազար դրամ, իսկ կանխիկ հայտարարագրել է մոտ 1․5 մլն դրամ։

Գայանե Խաչատրյան