Անդրեասյանի և Մինասյանի օրոք Արդարադատության նախարարությունում պաշտոնավարած Հայկ Սանոյանը Սրբուհի Գալյանի հրամանով ազատվել է պաշտոնից

Արդարադատության նախարարի հրամանով Հայկ Սանոյանն ազատվել է «Իրավական կրթության և վերականգնողական ծրագրերի իրականացման կենտրոն» պետական ոչ առևտրային կազմակերպության տնօրենի պաշտոնից։ Սանոյանը պատրաստվում է վիճարկել նախարարի հրամանը։

«Ասել, որ նշված հրամանը և դրա հիմքում ընկած հանգամանքները իրավաչափ են, նույնն է, ինչ ձմռանը ձմերուկ քաղել Արարատ լեռան գագաթից։

Այն, որ բոլոր իրավական միջոցներով իրացնելու եմ իմ պաշտպանության եղանակները և ապացուցելու եմ, որ սա եղել է ոչ թե իրավական գործընթաց, այլ մեկ անձի քմահաճույք, դա աներկբա է։

Այս պատմության ամենավատ բացահայտումն այն է, որ մեր պետական համակարգում համառորեն շարունակում է գերիշխել այն մտածելակերպը, թե եթե վերադասը որոշել է չաշխատել քո հետ, ապա դու պետք է հաշվի նստես դրա հետ։

Իմ այս մոտեցման հետ սկզբունքորեն համաձայն չլինելու հետևանքով է, որ դարձել եմ «կարգազանց» աշխատող, որպիսի կարգավիճակը, սակայն, ի հեճուկս իմ նախկին վերադասի, խիստ ժամանակավոր է և կստանա արժանի իրավական գնահատական»,-Facebook սոցիալական ցանցի իր էջում գրել է Սանոյանը։

Նշենք, որ Սանոյանը մինչ պետական համակարգում պաշտոններ զբաղեցնելը եղել է փաստաբան և աշխատել Արդարադատության նախկին նախարարներ Կարեն Անդրեասյանի կնոջ և Գրիգոր Մինասյանի հիմնած «Էյ Էմ» իրավաբանական ընկերությունում։

2018-2022 թվականներին աշխատել է ՊԵԿ-ում, այնուհետև 2022 թվականին, երբ Կարեն Անդրեասյանն արդեն Արդարադատության նախարար էր, նշանակվել է նախարարի խորհրդական, ապա՝ Արդարադատության նախարարության վերահսկողության վարչության պետ և այս պաշտոնին մնացել մինչև 2024-ի օգոստոս, այսինքն՝ նաև Արդարադատության հաջորդ նախարար Գրիգոր Մինասյանի պաշտոնավարման ընթացքում։

Սանոյանը «Իրավական կրթության և վերականգնողական ծրագրերի իրականացման կենտրոն» պետական ոչ առևտրային կազմակերպության տնօրեն էր նշանակվել 2024-ի օգոստոսի 6-ին՝ Գրիգոր Մինասյանի հրամանով։

Հիշենցնեք, որ 2024-ի նոյեմբերին Գրիգոր Մինասյանը հրաժարականի դիմում է ներկայացրել և ազատվել նախարարի պաշտոնից։ Նրան փոխարինել է Սրբուհի Գալյանը, որը, փաստորեն, պաշտոնավարումից ամիսներ անց Սանոյանին ազատել է զբաղեցրած պաշտոնից։

Նշենք, որ «Իրավական կրթության և վերականգնողական ծրագրերի իրականացման կենտրոն» ՊՈԱԿ-ն իրականացնում է Հայաստանի Հանրապետության արդարադատության նախարարության քրեակատարողական և հարկադիր կատարումն ապահովող ծառայության ծառայողների հատուկ ուսուցումը (օրենքով նախատեսված հրազեն և հատուկ միջոցներ կրելու, պահելու և գործադրելու (կիրառելու) հետ կապված գիտելիքների, ունակությունների և հմտությունների ձեռքբերում) և քրեակատարողական ծառայողների վերապատրաստումը (մասնագիտական գիտելիքների և աշխատանքային ունակությունների կատարելագործման նպատակով շարունակական ուսուցում):

Կենտրոնը մասնագիտացված է քրեական արդարադատության ոլորտում վերականգնողական ծրագրերի մշակման, ինչպես նաև իրավախախտում կատարած անձանց ծառայությունների մատուցման ուղղությամբ: Այն արդարադատության ոլորտում կայուն հիմքով ծառայություններ է մատուցում և դասընթացներ է իրականացնում ՀՀ արդարադատության նախարարության քրեակատարողական հիմնարկներում պատիժ կրող անձանց և պրոբացիայի շահառուների համար:

Բացի այդ՝ Կենտրոնի կողմից քրեակատարողական հիմնարկներում իրականացվող «Իրավախախտում կատարած անձանց գեղագիտական դաստիարակություն և կրթություն» ծրագիրն ուղղված է դատապարտյալների համար գեղագիտական և կրթական դասընթացների իրականացմանը:

Կենտրոնն իրականացնում է նաև Անչափահասների արդարադատության խորհրդի քարտուղարությունը, ինչով էլ պայմանավորված՝ համակարգում է նիստերի կազմակերպման և խորհրդի գործունեությանն ուղղված ամբողջ աշխատանքները, անչափահասների շրջանում մշակում և իրականացնում է հետազոտություններ, պատրաստում է մասնագիտական ձեռնարկներ, կազմակերպում է մասնագիտական փորձի փոխանակման հանդիպում-քննարկումներ, արդարադատության մատչելիությանն ու իրազեկմանն ուղղված երեխաների հետ բազմաթիվ միջոցառումներ են կազմակերպվում:

Կենտրոնի կողմից իրականացվում են հաշտարարների, սնանկության գործով կառավարչի հավակնորդների, նոտարների թեկնածուների ու գործող նոտարների ուսուցում և վերապատրաստում։

Արաքս Մամուլյան