14.09.2026 | 10:00
ԱԺ քառօրյայի մեկնարկը` ՈՒՂԻՂ
SMS ստանալու ա՞հ, թե՞ պատասխանատվություն ստանձնելու ռիսկ․ ինչու չի համալրվում ԲԴԽ կազմը․ ՏԵՍԱՆՅՈՒԹ
Քաղաքականություն
04.02.2025 | 21:55
Բարձրագույն դատական խորհրդի կազմն արդեն մի քանի ամիս է՝ լիարժեք չէ․ տևական ժամանակ է՝ Խորհրդում չի հաջողվում լրացնել գիտնական անդամների 3 թափուր պաշտոնները։ Համալրելու վերջին փորձն ընդամենը մեկ շաբաթ առաջ ձախողվեց․ փաստաբան Ալեքսանդր Սիրունյանն այդպես էլ չնստեց ԲԴԽ անդամի աթոռին․ նրա թեկնածությանը դեմ էին քաղհասարակությանն ու ընդդիմությունը։
ՔՊ-ական Սիրունյանի թեկնածությունը կոշտ քննադատության էր արժանացել այն պատճառով, որ մինչ այս փաստաբանն իր ֆեյսբուքյան էջում, որի հետնանկարում վարչապետ Նիկոլ Փաշինյանն էր, պարբերաբար հայհոյախառն գրառումներ էր անում քաղաքական հակառակորդների հասցեին։ «Քաղաքացիական պայմանագիր» խմբակցությունը որոշեց իր իսկ կողմից առաջադրված թեկնածուի հարցը ԱԺ-ում քվեարկության չդնել։
Ինքնաբացարկի այս գործընթացից հետո իշխանությունը դեռ լռում է, մինչ այդ, ԲԴԽ գիտնական անդամի ևս մեկ աթոռ շարունակում է թափուր մնալ։ Այս օրերին տեղեկություններ շրջանառվեցին, որ իշխող ուժի հաջորդ թեկնածուն լինելու է Տիգրան Եգորյանը։ Փաստաբանը, սակայն, Factor TV-ի հետ զրույցում հերքեց՝ չմանրամասնելով՝ ստացե՞լ է առաջարկ, հանդիպե՞լ է վարչապետ Փաշինյանի հետ, թե՝ ոչ։
Խորհրդում այս իրավիճակը ստեղծվեց, երբ 2024 թվականի հոկտեմբերին գիտնական անդամներ Հայկ Գրիգորյանը և Վիգեն Քոչարյանն ընտրվեցին Վճռաբեկ դատարանի դատավորներ, իսկ մյուս անդամ՝ նախկինում խորհրդի նախագահ Կարեն Անդրեասյանը, Փաշինյանի հորդորով նոյեմբերին հրաժարական ներկայացրեց։ Օրեր անց նա փորձեց բացատրել իր քայլը՝ նշելով՝ դեռևս գարնանն էր ցանկանում թողնել պաշտոնը։
Ուշագրավ է, որ հրահանգով պաշտոն թողնելու այս դեպքը միակը չէ Բարձրագույն դատական խորհրդի պատմության մեջ։ Ավելին, այդ պատմությունն այսօր դարձել է քրեական գործ։ 2022 թվականի հունիսին Ռուբեն Վարդազարյանը 15 րոպե տևողությամբ ձայնագրություն էր հրապարակել, ըստ որի՝ այդ ժամանակ ԲԴԽ նախագահի պաշտոնակատար Գագիկ Ջհանգիրյանն իրեն հորդորել էր ինքնակամ հեռանալ խորհրդի նախագահի պաշտոնից՝ երաշխավորելով, որ այդ դեպքում նրա դեմ քրեական գործեր չեն հարուցվի։
Ջհանգիրյանը խոստովանել էր, որ այդ հանդիպման ժամանակ փորձել է հոգեբանական հնարքներ կիրառելով՝ դրդել Վարդազարյանին գնալ այդ քայլին։
Նմանօրինակ պատմություննե՞րն են պատճառը, թե՞ պաշտոնը գայթակղիչ չէ, որ Խորհուրդն ամիսներ շարունակ մնացել է չհամալրված․ նախկին դատավորները գրեթե նույնաբովանդակ խնդիրներ են մատնանշում։
Վերաքննիչ քրեական դատարանի նախկին դատավոր, գրեթե 1 տարի ԲԴԽ անդամի պաշտոնը զբաղեցրած Արշակ Վարդանյանի կարծիքով՝ եթե դու գնում ես Խորհուրդ առանց որևէ անձի կամ ուժի ծառայելու, ապա որևէ կաշկանդող գործոն չկա այդ պաշտոնի համար։
Դեռևս 2019 թվականին, երբ Խորհրդի գիտնական անդամ Հայկ Հովհաննիսյանը հրաժարականի դիմում էր ներկայացրել, մատնանշել էր՝ դատական բարեփոխումները պետք է իրականացվեն հրատապ և արդյունավետ կարգով։ Իրավապաշտպան Նինա Կարապետյանցն այսօր էլ հիշեցնում է Հովհաննիսյանի այս նկատառումը և ընդգծում՝ բարեփոխումների դանդաղելու պատճառով ոչ ոք չի ցանկանում իր համբավն արատավորել։
Բարձրագույն դատական խորհուրդը որոշումների հավասարությունը պահելու համար պետք է կազմված լինի 10 անդամից, որից 5-ն ընտրվում է Դատավորների ընդհանուր ժողովի կողմից, 5-ը գիտնական անդամներն են և ընտրվում են խորհրդարանի կողմից։ Այսօր այս հավասարությունը փաստացի խախտված է։
Մանրամասները՝ տեսանյութում։
Ռոզա Վարդանյան
