Քաղաքականություն
07.10.2025 | 19:41Երևանի քաղաքապետարանը անցյալ տարի Էրեբունի-Երևանի 2806-ամյակի տոնակատարությունների շրջանակում 180 հազար դոլար հատկացրեց՝ 15 երգի նորացված կատարումներ ձայնագրելու, ինչպես նաև 1 նոր երգ ու տեսահոլովակ ստեղծելու համար։ Ու թեև ծրագիրը 2024-ի տոնակատարություններին էր նվիրված, շուրջ 1 տարի անց՝ 2025-ի տոնակատարությունների նախաշեմին, դրանք դեռ չեն հրապարակվել։
Երևանի փոխքաղաքապետ Լևոն Հովհաննիսյանը վստահեցնում է՝ թե՛ երգերը, թե՛ տեսահոլովակը պատրաստ են:
«Որոշեցինք, որ ավելի թեմատիկ ժամանակահատվածում դրանք ներկայացնենք հանրությանը և Էրեբունի-Երևան 2807 տոնակատարության շրջանակում դուք կտեսնեք տեսահոլովակը և քաղաքի տարբեր հարթակներում կհնչեն երգերը, որոնք համար գումար ենք հատկացրել»,- ասաց Լևոն Հովհաննիսյանը։
Երևանի քաղաքապետարանը 180 հազար դոլարը վճարել է 2013 թվականին հիմնադրված «Կոմբինատ փրոդաքշն» ՍՊԸ-ին, որը որևէ պետական գնման չի մասնակցել, համենայն դեպս, գնումների պետական համակարգում այդ մասին վկայող որևէ ինֆորմացիա չկա։
«Էս ամեն ինչը շատ թափանցիկ գործընթացով է եղել, համագործակցել ենք «Շարմ հոլդինգ» ընկերության հետ»,- ասաց Հովհաննիսյանը։
Քաղաքապետարանի ու «Կոմբինատ փրոդաքշն» ընկերության միջև դրամաշնորհի պայմանագիր է կնքվել, ուշագրավն այն է, որ դրամաշնորհը տրամադրվել է առանց մրցույթի՝ ընկերության տնօրեն Լիլիթ Մարտիրոսյանի գրության հիման վրա։ Պայմանագիրը կնքվել է 2024 թվականի օգոստոսի 2-ին՝ 15 երգերի գործիքավորման, կատարողների ընտրության, ձայնագրման, միքսինգի, մասթերինգի և նոր հեղինակային երգի ստեղծման համար։ Մեկ տարի անց անգամ պայմանագիրը չի հրապարակվել։ Ֆինանսական և կառավարման փորձագետ Արտակ Քյուրումյանն այս գործընթացում կոռուպցիոն ռիսկեր է տեսնում։
«Ով գիտի, որ կարող է դիմել քաղաքապետարանին և իր ուզած միջոցառման համար ֆինանսավորում ստանալ, արդյո՞ք դիտարկվում են այլընտրանքներ, ինչպես է կազմվում տեխնիկական բնութագիրը․ հանրային միջոցների օգտագորման հետ կապված մի շարք հարցեր կան»,- ընդգծեց Քյուրումյանը։
Ի դեպ, Լևոն Հովհաննիսյանի հիշատակած «Շարմ հոլդինգ»-ի գործադիր մարմնի ղեկավարը 2019-ից Լիլիթ Մարտիրոսյանն է։ Հոլդինգի 50%-ի բաժնեմասի սեփականատերը Ռուբեն Ջաղինյանն է, 25-ական տոկոս բաժնեմասեր ունեն Կարեն Ղազարյանը և Հրանտ Թոխատյանը։ Ռուբեն Ջաղինյանի հետ փոխկապակցված է նաև «Ֆակտորի փրոդաքշն» ընկերությունը, որը կառավարական տարբեր միջոցառումներ կազմակերպելու համար առանց որևէ մրցակցության բազմամիլիոնանոց ծրագրեր է շահել։ Էրեբունի-Երևան 2806-ամյակի եզրափակիչ համերգի կազմակերպիչը ևս «Ֆակտորի փրոդաքշն»-ն էր։ Այս ընկերության հիմնադիրներն են Վազգեն Պողոսյանը և Ռուդիկ Տեր-Գալստյանը, որոնք աշխատել են «Շարմ հոլդինգ» ՍՊԸ-ում, և Հանրային հեռուստաընկերությունում, երբ խորհրդի նախագահը Ռուբեն Ջաղինյանն էր։
Ի՞նչ նկատի ունի փոխքաղաքապետը, երբ պնդում է, որ թափանցիկ գործընթաց է եղել։
«Մասնագիտացված և պորեֆեսիոնալ թիմ, գիտելիք ու փորձ ունեցող քիչ կազմակերպություններ կան, որոնք կարող են այդ ծավալի պատշաճ աշխատանք անել»,- բացատրեց Հովհաննիսյանը։
Հաշվի առնելով, որ «Կոմբինատ փրոդաքշն»-ը որևէ պետական գնման չի մասնակցել և մի քանի անգամ արգելանքի տակ է եղել՝ ստացվում է, որ Հովհաննիսյանը պրոֆեսիոնալ թիմ ու փորձ ունեցող ընկերություն ասելով նկատի ունի փոխկապակցված ընկերություններին։
Ֆինանսական և կառավարման փորձագետ Արտակ Քյուրումյանը հակադարձում է՝ սա ոչ թափանցիկ աշխատանքի վառ դրսևորում է։
«Եթե իրենք ուզում են բաց, թափանցիկ, հաշվետու գործունեություն ծավալել, ապա պետք է հրապարակեն պայմանագիրը»,- նշեց Քյուրումյանը։
Ի դեպ, ուշագրավ է, որ 15 երգերից միայն միայն 3-ն են Երևանի մասին։ Լիլիթ Մարտիրոսյանն անցյալ տարի Factor TV-ի գրավոր հարցմանն ի պատասխան հայտնել էր, որ նախագծում ընդգրկված են նաև երգեր, որոնք տարիներ շարունակ հնչել են մայրաքաղաքի տարբեր վայրերում և սիրված են ժողովրդի կողմից, իսկ երգերի ձայնագրությունների մտահղացումը «Կոմբինատ փրոդաքշն» ընկերությանն է։ Փոխքաղաքապետի վստահեցմամբ՝ 180 հազար դոլարից բացի ընկերությանը հավելյալ գումար չի տրամադրվել։
Էրեբունի-Երևան 2807-ամյակի տոնակատարությունները կսկվեն հոկտեմբերի 11-ից և կամփոփվեն հոկտեմբերի 12-ին։ Ըստ Լևոն Հովհաննիսյանի՝ տեսահոլովակն ու երգերի նորացված կատարումները կհնչեն այդ երկու օրերի ընթացքում, ապա կհրապարակվեն։
Մանրամասները՝ տեսանյութում։
Արփի Հակոբյան
