Նոր տենդենց Ադրբեջանի Մեջլիսում․ մանդատները «ժառանգաբար փոխանցվել են» հայրերից զավակներին

Ադրբեջանում սեպտեմբերի 1-ին անցկացված Միլլի Մեջլիսի արտահերթ ընտրությունների արդյունքներով՝ երկրի նախագահ Իլհամ Ալիևի ղեկավարած «Նոր Ադրբեջան» կուսակցությունը խորհրդարանում ստանում է մեծամասնություն՝ 125 մանդատներից 68-ը։ Մնացած մանդատները բաժին են հասնում իշխանությունների վերահսկողության տակ գտնվող ուժերին։

ԿԸՀ-ի նախնական տվյալներով՝ Ադրբեջանի խորհրդարանի նոր կազմում ընդգրկվել է մարդկանց մի խումբ, որոնք նախկին պատգամավորների ու պետական ​​պաշտոնյաների երեխաներն ու հարազատներն են, գրում են ադրբեջանական լրատվամիջոցները։

Նրանք են՝ Գյունայ Էֆենդիևան՝ նախկին փոխվարչապետ Էլչին Էֆենդիևի դուստրը, Գյունայ Աղամալին՝ Մեջլիսի նախկին պատգմավոր Ֆազայիլ Աղամալիի դուստրը, Թանզիլյա Ռուստամխանլին՝ նախկին պատգամավոր Սաբիր Ռուստամխանլիի կինը, Սամիր Վելիևը՝ նախկին պատգամավոր Ահմեդ Վելիևի որդին, Փարվանա Վելիևան՝ ԱԳ փոխնախարար Էլնուր Վելիևի կինը, Նիգյար Մամեդովան՝ արդարադատության նախկին նախարար Ֆիքրեթ Մամեդովի դուստրը, Մահիր Սուլեյմանովը՝ նախկին պատգամավոր Թահիր Սուլեյմանովի որդին, Ֆարիզ Իսմայիլզադեն՝ նախկին պատգամավոր Հադա Ռաջաբլիի եղբոր որդին։ Վերջինը նաև ADA դիվանագիտական համալսարանի պրոռեկտորն է, Հայաստանի դեմ իրականացնող Բաքվի քարոզչական արշավի ակտիվ մասնակիցներից։

Քաղաքագետ Նասիմի Մամեդլին հայտարարել է, որ նախնական արդյունքներով՝ նախորդ խորհրդարանից մնացել է 88 պատգամավոր։ 37 նոր պատգամավորներից 7-ը խորհրդարանում եղել են նախորդ տարիներին։ Մանդատ ստացած 30 անձինք էլ նոր դեմքեր են։

«Սակայն ես չկարողացա 25 նոր պատգամավորների մասին տեղեկություն գտնել նույնիսկ Google որոնողական համակարգում։ Պարզ չէ, թե նրանք ովքեր են և ինչով են զբաղվել»,- ասել է Մամեդլին։

Հիշեցնենք, որ անկախ դիտորդներն ու ընդդիմադիր կուսակցությունները հայտնել էին ընտրություններին զանգվածային ընտրախախտումների մասին, որոնց տեսանյութերը տարածվել են նաև համացանցում։ Գրանցվել են քվեաթերթիկների լցոնումների, կարուսելային քվեարկության, ընդդիմադիր թեկնածուների, դիտորդների և լրագրողների վրա հարձակումների դեպքեր։

Ընտրախախտումները արձագանագրել էին նաև ԵԱՀԿ դիտորդները։ Ընտրությունների վերաբերյալ ԵԱՀԿ մտագոհությունները կիսող հայտարարություններով են հանդես եկել ԱՄՆ-ն ու ԵՄ-ն։

Էմմա Չոբանյան