Մեկ տարում սնունդը թանկացել է 11.4%-ով․ բանջարեղենի գներն աճել են ավելի քան 30%-ով․ նոր տվյալներ․ ՏԵՍԱՆՅՈՒԹ

Այս տարվա փետրվարին, նախորդ տարվա նույն ամսվա համեմատ, Հայաստանում  սննդամթերքն ու ոչ ալկոհոլային խմիչքները թանկացել են 11.4%-ով, իսկ 2022թ. հունվարի համեմատ՝ 0.1%նվազում է արձանագրվել: Այս մասին Factor.am-ը տեղեկանում է Վիճակագրական կոմիտեի հրապարակած տվյալներից։ 

Ընդհանուր առմամբ, սպառողական գների ինդեքսը փետրվարին, նախորդ տարվա նույն ամսվա համեմատ, աճել է 6,5%-ով, իսկ նախորդ ամսվա՝ հունվարի համեմատ՝ 0,1%-ով։ 

Սննդամթերքից մեկ տարվա կտրվածքով ամենաշատը թանկացել է ձուկն ու ծովամթերքը՝ 31%-ով, դրան հաջորդում է բանջարեղենը, որը մեկ տարում թանկացել է 31 %-ով, շաքարը, շոկոլադն ու շաքարային հրուշակեղենը թանկացել է 11 %-ով, հացաբուլկեղենն ու ձավարեղենը՝ 10 %-ով, կաթնամթերք-պանիր-ձու, սուրճ-թեյ-կակաո, օղի, ծախոտային  արտադրատեսակներ ապրանքախմբերում թանկացումը կազմել է ավելի քան 9%: 

Ձուն նախորդ ամսվա՝ հունվարի համեմատ էժանացել է 11%-ով, իսկ նախորդ տարվա նույն ամսվա համեմատ նվազումը կազմել է 1.0%։ 

Կարագը, թեև նախորդ ամսվա համեմատ էժանացել է 1%-ով, այնուամենայնիվ, մեկ տարվա կտրվածքով 7,8%-ով թանկացում է գրանցվել։ 

Շաքարն ու շաքարավազը մեկ տարում թանկացել է 18 %-ով, իսկ հունվարի համեմատ՝ 0.3%-ով էժանացել է։ Պանրի գինը 2022թ. փետրվարին, 2021-ի փետրվարի համեմատ, աճել է 17 %-ով, իսկ 2022-ի հունվարի համեմատ՝ 1.8%-ով: 

Էական թանկացում է գրանցվել մսամթերքի շուկայում։ Մեկ տարում թռչնամսիսն, տավարի ու գառան միսը թանկացել է շուրջ 8%-ով, խոզի միսը՝ շուրջ 32 %-ով։ Հունվարի համեմատ մսամթերքի թանկացումը կազմել է  0.3-ից 1.4%՝ կախված մսի տեսակից։ 

Թարմ կաղամբը մեկ տարում թանկացել է 3.8 անգամ, հունվարի համեմատ՝ ավելի քան 5 %-ով էժանացել է։ Իսկ կարտոֆիլը փետրվարին, նախորդ տարվա նույն ամսվա համեմատ, թանկացել է շուրջ 72 %-ով, միայն մեկ ամսում, այսինքն՝ հունվարի համեմատ, կարտոֆիլը թանկացել է ավելի քան 8 %-ով:

Ոչ պարենային ապրանքների շուկայում 1 տարում գրանցվել է 5.4% գնաճ, իսկ նախորդ ամսվա՝ հունվարի համեմատ գնաճը կազմել է 0.2%:

Բենզինը, հունվարի համեմատ, 1.4%-ով էժանացել է, դիզելային վառելիքը՝ 2.7%-ով թանկացել: Այնուամենայնիվ, մեկ տարում բենզինը թանկացել է ավելի քան 31%-ով, դիզելային վառելիքը՝ 44%-ով։

ԱՄՆ դոլարը, հունվարի համեմատ, 0.4% նվազել է․ այսինքն՝ ՀՀ դրամն արժևորվել է, իսկ մեկ տարվա կտրվածքով՝ 0.9%-ով թանկացել է։ 

Նշենք, որ Վիճակագրական կոմիտեն ներկայացրել է փետրվար ամսվա տվյալները ընդհանրացրած, թեև փետրվարի վերջին օրերին, ինչպես նաև մարտի առաջին օրերին դոլարը զգալի թանկացավ։ Եթե փետրվարի 23-ին դոլարի առքը կազմում էր շուրջ 478 դրամ, ապա այսօր դրա փոխարժեքը 503 դրամ է։ Նշենք նաև, որ նախորդ տարվա փետրվարին դոլարի միջինացված փոխարժեքը 523.5 դրամ է եղել: Այսինքն, չնայած վերջին  թանկացմանը, այնուամենայնիվ, նախորդ տարվա նույն ժամանակահատվածի համեմատ՝ փոխարժեքի նվազում է գրանցվել։