02.05.2024 | 20:30
Ադրբեջանում Երևանն իրենցն են համարում․ հարցումների մտահոգիչ արդյունքներն ու Բաքվի քաղաքականությունը. ՏԵՍԱՆՅՈՒԹ
8 զոհ ու մի քանի տասնյակ վիրավոր․ ականատեսը պատմել է Պերմի համալսարանում կրակոցների մասին
Քաղաքականություն
20.09.2021 | 13:30
Ինչպես արդեն հայտնել ենք, Պերմի համալսարանի (ПГНИУ) մասնաշենքերից մեկում անհայտ անձը կրակ է բացել: Իրավասու մարմինները հայտնում են ութ զոհի մասին, գրում է BBC-ի ռուսական ծառայությունը:
Պերմում ոստիկանները բերման են ենթարկել համալսարանի ուղղությամբ կրակ բացած մի տղամարդու, հայտնում է ՌԴ ներքին գործերի նախարարությունը:
Այսօր առավոտյան ոստիկանության հերթապահ վարչությունը հաղորդագրություն է ստացել, որ կրակոցների ձայներ են լսվում Պերմի պետական ազգային հետազոտական համալսարանի տարածքում: Ռուսաստանի Քննչական կոմիտեն հայտնել է, որ զոհվել է ութ մարդ: ՌԴ առողջապահության նախարարության տվյալներով ՝ 24 վիրավորի բուժօգնություն է ցուցաբերվել, որոնցից 19 -ը ՝ հրազենային վնասվածքներով:
«Կասկածյալի ինքնությունը պարզված է: Ձերբակալության ժամանակ դիմադրություն ցուցաբերելու ընթացքում նա վիրավորվել է», – հայտնել են գերատեսչությունից։
Հարձակվողի անունը չի նշվում հաղորդագրության մեջ:
Տղամարդը մի քանի կրակոց է արձակել թիվ 8 մասնաշենքում:
Սկզբում Պերմի պետական ազգային հետազոտական համալսարանը հայտնել էր, որ հրաձիգը սպանվել է, սակայն հետագայում այս հաղորդագրությունը անհետացել է համալսարանի կայքից:
ՌԻԱ Նովոստին իր տեղեկություններով հայտնում է, որ հարձակվողը զենքը ձեռք է բերել օրինական ճանապարհով։
Ողբերգությանը ականատես, լրագրության և զանգվածային հաղորդակցության ամբիոնի դոցենտ Իվան Պեչիշչևը զրուցել է BBC- ի հետ: Նրա խոսքով՝ Պերմի ժամանակով ժամը 11: 30 -ի սահմաններում նա գնացել է դասի և տեսել, թե ինչպես են ութերորդ մասնաշենքից փախչում ուսանողները, և թե ինչպես են մարդիկ դուրս թռչում շենքի երկրորդ հարկից:
«Նրանք սարսափած, ճիչերով դուրս էին ցատկում։ Ինձ ուսանողներից մեկն ասաց, որ կրակոցներ են։ Ես կրակոցի ձայներ լսեցի, բոլորը սկսեցին տարբեր կողմեր փախչել։ Ես գնացի երկրորդ կորպուս՝ իմ ուսանողների մոտ, կրակոցները շարունակում էին լսվել»,- պատմել է ականտեսը։
Նրա խոսքով ՝ Պերմի համալսարանի տարածքում կա մոտ 10 մասնաշենք, իսկ անվտանգության ծառայությունն անմիջապես փակել է բոլոր շենքերի մուտքերն ու անցումները: Այդ պահին նա արդեն դժվարությամբ է մտել իր կորպուսը: «Սահմռկեցուցիչ էր փողոցում լինելը»,- խոստովանում է Պեչիշչևը:
Տաթև Ֆռանգյան
