Դատավորին վիրավորելու համար մեղադրվող փաստաբանի նկատմամբ մեղադրական վերդիկտ է կայացվել

Երևանի առաջին ատյանի ընդհանուր իրավասության քրեական դատարանը մեղադրական վերդիկտ է կայացրել փաստաբան Ալեքսանդր Սիրունյանի նկատմամբ՝ դատավորին վիրավորելու գործով։

Դատաքննությամբ հաստատված է համարվել, որ փաստաբանը, հանդես գալով քրեական վարույթով մեղադրյալի պաշտպանի կարգավիճակով, դատարան ներկայացված միջնորդությունների քննության առնչությամբ անհարգալից վերաբերմունք է դրսևորել դատարանի նկատմամբ՝ պաշտոնեական լիազորությունների իրականացման կապակցությամբ վիրավորելով դատավորին։

Դատարանի հաղորդագրությունը՝ ստորև․

«Երևան քաղաքի առաջին ատյանի ընդհանուր իրավասության քրեական դատարանում ավարտվել է թիվ ԵԴ1/3890/01/25 քրեական գործի դռնբաց դատաքննությունն՝ ըստ մեղադրանքի՝ Ա.Ս.-ի՝ Քրեական օրենսգրքի 489-րդ հոդվածի 2-րդ մասով նախատեսված հանցանքի կատարման վերաբերյալ։

Դատաքննությամբ հետազոտված՝ պատշաճ իրավական ընթացակարգով ձեռք բերված ապացույցների ամբողջությամբ հաստատվել է, որ Ա.Ս.-ն, հանդիսանալով Քննչական կոմիտեի Արարատի մարզային քննչական վարչության Մասիսի քննչական բաժնի վարույթում քննված քրեական վարույթով մեղադրյալի պաշտպանը, նախաքննության մարմնի կողմից Արարատի և Վայոց ձորի մարզերի առաջին ատյանի ընդհանուր իրավասության դատարան ներկայացված միջնորդությունների կապակցությամբ անհարգալից վերաբերմունք է դրսևորել դատարանի նկատմամբ՝ պաշտոնեական լիազորությունների իրականացման առնչությամբ վիրավորելով դատավորին։

Հիմնական դատալսումների արդյունքներով՝ դատարանը, հաստատված համարելով Քրեական օրենսգրքի 489-րդ հոդվածի 2-րդ մասով նախատեսված հանցանքի կատարման մեջ Ա.Ս.-ի մեղավորությունը, նրա նկատմամբ կայացրել է մեղադրական վերդիկտ»։

Հիշեցնենք, որ Factor.am-ը ավելի վաղ տեղեկացրել էր, որ վարույթը նախաձեռնվել է 2025 թվականի օգոստոսի սկզբին, սակայն Սիրունյանն առաջին անգամ Քննչական կոմիտե է հրավիրվել հոկտեմբերի 22-ին։ Նույն օրը նրան մեղադրանք էր ներկայացվել և նախաքննության ավարտ հայտարարվել, որից հետո գործն ուղարկվել էր հսկող դատախազին՝ դատարան ուղարկելու միջնորդությամբ։ Այսպես՝ 2025 թվականի օգոստոսի 5-ին Ալեքսանդր Սիրունյանը Ֆեյսբուքի իր էջում գրառում էր կատարել այն մասին, որ մարզերից մեկում «Քննչականի պետն է գործերի բաշխումն անում»:

«Մի հատ մարզ կա, որտեղ դատավորների գործերի բաշխումն անում ա քննչականի պետը: Ինքն ա որոշում՝ որ դատավորին որ միջնորդությունը գրի։ Էս խոտաբույսերն էլ վեկալում քննում են»,- գրել էր Սիրունյանն ու ընդհանրական, առանց անուններ նշելու, այլ անպարկեշտ արտահայտություն արել դատավորի հասցեին։ Մեզ հայտնի էր դարձել նաև, որ դատավոր Սարգիս Հովհաննիսյանն էր հանդես եկել Սիրունյանին քրեական պատասխանատվության ենթարկելու նախաձեռնությամբ՝ գլխավոր դատախազ Աննա Վարդապետյանին գրություն ուղարկելով և, ըստ էության, համարելով, որ գրառումն իր մասին է։