Փաստաբանների խնդիրը ոչ թե այն է, որ այդ դրույթը «Դատական օրենսգրքից» տեղափոխվի «Քրեական դատավարության» օրենսգիրք, այլ առհասարակ վերացվի

Այսօր ԱԺ պետաիրավական և մարդու իրավունքների պաշտպանության հարցերի մշտական հանձնաժողոովի նիստում արդարադատության նախարար Դավիթ Հարությունյանը տեղեկացրեց, որ «Դատական օրենսգրքից» հանվել է փաստաբաններին մինչև 100 հազար դրամով տուգանելու դրույթը և տեղափոխել «Քրեական դատավարության» օրենսգիրք։

Այս փոփոխությունը, սակայն, փաստաբաններին պայքարից ետ չի կանգնեցի։

Հիշեցնենք, որ փաստաբաններն այդ դրույթը վերացնելու պահանջ էին ներկայացրել, նրանք գործադուլ էին իրականացրել, ինչպես նաև ստորագրահավաք կազմակերպել։

Փաստաբան Երեմ Սարգսյանը Factor.am-ին ասաց, որ փաստաբանների խնդիրը ոչ թե այն է, որ այդ դրույթը «Դատական օրենսգրքից» տեղափոխվի «Քրեական դատավարության» օրենսգիրք, այլ առհասարակ վերացվի․ «Այդ նորմով ակնհայտ ճնշում է լինելու փաստաբանների վրա։ Երբ օրինակ է բերվում այլ երկրների փորձը, պետք է նաև հաշվի առնեն, որ տարբերություն կա դատական կարգի, դատավորների գործունեության, հասարակության իրավագիտակցության մեջ։ Չեն կարող միայն նմանատիպ սանկցիաներ բերել, ասել՝ տեսեք, այնտեղ կա, այստեղ էլ պետք է լինի։ Մենք բազմաթիվ բողոքներ ունենք դատական ակտերի, դատավորների անկախության հետ կապված և այսօր հանկարծ ստացվում է, որ դատավորը կարող է տուգանել փաստաբանին»։

Երեմ Սարգսյանը նկատեց, այս քայլով փորձել են որոշակի լուծում տալ խնդրին, սակայն հարցի մասին վերջնական դիրքորոշում հայտնելու համար, անհրաժեշտ է սպասել, տեսնել, թե այս փոփոխությունն ի վերջո ինչպիսի նախագծով է ներկայացվելու։ Փաստաբան Հայկ Ալումյանն էլ,անդրադառնալով Դավիթ Հարությունյանի հայտարարությանն, ասաց․ «Ես չգիտեմ՝ ինչու են որոշել այդպես անել, բայց գիտեմ, որ վտանգավոր հետևանքներով հարուստ կարգավորում է դա։ Սկսած այն բանից, որ ինչպես ՍԴ-ում կարող է հակասահմանադրական դրույթ ճանաչվել, այնպես էլ Երոպական դատարանում, և Հայաստանը կտուգանվի։ Փաստաբանների նկատմամբ զսպաշապիկների կիրառումը խնդիր է ոչ միայն փաստաբանների, այլ նաև դատարանում հայտնված յուրաքանչյուր քաղաքացու համար։ Սա ռեպրեսիվ միջոց է, որի զոհն իրականում հասարակության ցանկացած ներկայացուցիչ է, ով կարող է դատարանում անհիմն մեղադրվել և իր փաստաբանի լեզուն կարճ լինի»։

Լիլիթ Շաբոյան