ԵՄ յոթ երկրներ պնդում են Կիևին փոխհատուցման վարկ տրամադրելու հարցում

Էստոնիայի, Ֆինլանդիայի, Իռլանդիայի, Լատվիայի, Լեհաստանի և Շվեդիայի վարչապետները, ինչպես նաև Լիտվայի նախագահը նամակ են հղել Եվրահանձնաժողովի նախագահ Ուրսուլա ֆոն դեր Լեյենին և Եվրախորհրդի նախագահ Անտոնիո Կոշտային՝ իրենց աջակցությունը հայտնելով ԵՄ-ում Ռուսաստանի սառեցված ակտիվների միջոցով Կիևին փոխհատուցման վարկ տրամադրելու՝ Եվրահանձնաժողովի առաջարկին, գրում է DW-ի ռուսական ծառայությունը:

«Բացի ֆինանսապես առավել նպատակահարմար և քաղաքականապես իրատեսական լուծում լինելուց՝ այն պաշտպանում է Ուկրաինայի՝ ագրեսիայի պատճառած վնասի համար փոխհատուցման հիմնարար սկզբունքը»,- ասվում է նամակում:

Նամակի հեղինակներն ընդգծում են, որ եթե դեկտեմբերին ԵՄ գագաթնաժողովում որոշում կայացվի փոխհատուցման վարկի վերաբերյալ, Ուկրաինան ավելի ամուր դիրքում կլինի՝ պաշտպանվելու և «արդար և երկարատև խաղաղության» շուրջ բանակցելու համար։

Politico-ի տվյալներով՝ Գերմանիան կլինի Ուկրաինային հնարավոր փոխհատուցման վարկի ամենամեծ երաշխավորը։ Եվրահանձնաժողովը հույս ունի, որ Բեռլինը կհամաձայնի երաշխավորել ավելի քան 50 միլիարդ եվրո՝ համոզելու Բելգիային՝ Ուկրաինային հանձնել բելգիական Euroclear պահոցում սառեցված 185 միլիարդ եվրոյի ռուսական ակտիվները։ Ֆրանսիան և Իտալիան նույնպես, ամենայն հավանականությամբ, կերաշխավորելուն 34 միլիարդ և 25 միլիարդ եվրո, համապատասխանաբար։

Դեկտեմբերի 3-ին Գերմանիայի կանցլեր Ֆրիդրիխ Մերցը Frankfurter Allgemeine Zeitung (FAZ) թերթում հրապարակված հոդվածում կոչ էր արել ԵՄ երկրներին աջակցել Ուկրաինային վարկ տրամադրելու համար ռուսական ակտիվներն օգտագործելու առաջարկին՝ կիսելով բոլոր ռիսկերը և իրավաբանորեն ամրագրելով այդ պարտավորությունները։ Նա նշել էր, որ դա միանշանակ ազդանշան կուղարկի Մոսկվային, որը պատրաստվում է Արևմուտքի հետ ռազմական հակամարտության և սպառնում է Եվրոպայի ազատությանն ու անվտանգությանը։

«Սա ոչ թե այս պատերազմը շարունակելու, այլ այն ավարտելու ազդանշան է։ Մենք կուղարկենք եվրոպական անկախության ազդանշան, որ մենք՝ եվրոպացիներս, ինքներս ենք որոշում, թե ինչ է կատարվում մեր մայրցամաքում»,- գրել է Մերցը։

Ռուսաստանի կողմից Ուկրաինա լայնածավալ ներխուժումից հետո արևմտյան երկրները սառեցրել են շուրջ 210 միլիարդ եվրոյի ռուսական ակտիվներ: Եվրոպական հանձնաժողովն առաջարկել է այդ ակտիվներից 140 միլիարդ եվրոն օգտագործել Ուկրաինային, այսպես կոչված, «փոխհատուցման վարկ» տրամադրելու համար: Այս պլանի համաձայն՝ միջոցները օրինականորեն չէին բռնագրավվի, այլ Ռուսաստանը կկարողանար դրանք վերադարձնել միայն Ուկրաինային փոխհատուցում վճարելուց հետո: Այնուհետև Ուկրաինան կօգտագործեր Ռուսաստանի կողմից վճարված փոխհատուցումները՝ ԵՄ-ից ստացված «փոխհատուցման վարկը» մարելու համար։

Միևնույն ժամանակ, Բելգիայի վարչապետը Եվրահանձնաժողովի նախագահությանն ուղղված նամակում ծրագիրն անվանել է «սկզբունքորեն սխալ և վտանգավոր»: Նա ընդգծել է, որ այն կխաթարի վստահությունը Euroclear-ի նկատմամբ, որը պահում է սառեցված ռուսական ակտիվները։

Թարգմանությունը՝ Էմմա Չոբանյանի