10.10.2026 | 13:16
ԱՄՆ-ն պատրաստակամություն է հայտնել աջակցելու Հայաստանի ԱԱԾ սահմանապահների վերապատրաստմանը
Բռնցքամարտի ԱԱ․ Բաչկովը, Հովհաննիսյանը, Մանասյանը և Չալոյանը 1/4 եզրափակիչում են
08.12.2025 | 20:32
Դուբայում ընթացող բռնցքամարտի աշխարհի առաջնության 5-րդ մրցումային օրը Հայաստանն ունի 8 ներկայացուցիչ, որոնցից հինգն արդեն ռինգ են դուրս եկել։
Տոկիոյի Օլիմպիական խաղերի բրոնզե մեդալակիր, Եվրոպայի եռակի չեմպիոն, աշխարհի առաջնության քառակի բրոնզե մեդալակիր Հովհաննես Բաչկովն (67 կգ) ուժեղ է գտնվել Ղրղզստանի ներկայացուցիչ Ալմազ Օրոզբեկովից և դուրս եկել քառորդ եզրափակիչ։
67 կգ քաշային կարգում Հայաստանի մյուս ներկայացուցիչ Արմեն Մաշակարյանը, որը հանդես է գալիս չեզոք դրոշի ներքո, պարտվել է գործող օլիմպիական չեմպիոն, ուզբեկ Ասադխուժա Մույդինխուժաևին և ավարտել ելույթը։
Արտուշ Հովհաննիսյանը (80 կգ) երկրորդ մենամարտում առավելության է հասել Ավստրալիայի ներկայացուցիչ Զախարի Բրոունի նկատմամբ և նվաճել քառորդ եզրափակիչի ուղեգիր։
Աշխարհի առաջնության բրոնզե մեդալակիր, Եվրոպայի փոխչեմպիոն Նարեկ Մանասյանը (92 կգ) տեխնիկական նոկաուտով հաղթել է ավստրալացի Լեո Նիկոլսոնին։
Քառորդ եզրափակիչում է նաև աշխարհի փոխչեմպիոն Դավիթ Չալոյանը (+92 կգ), որը մեկնարկային մենամարտում պարտության է մատնել Տաջիկստանի ներկայացուցիչ Մուհամեդ Աբրարիդինովին։
Երեկոյան մրցահերթում ռինգ դուրս կգան նաև Բարեղամ Հարությունյանը (48 կգ), Արթուր Բազեյանը (60 կգ) և Վախթանգ Հարությունյանը (75 կգ)։
Հայաստանի հավաքականն ԱԱ-ին մեկնել է 14 բռնցքամարտիկով։ Աշխարհի առաջնությունը կավարտվի դեկտեմբերի 13-ին, 13 քաշային կարգում մասնակցում է 108 երկրի 428 բռնցքամարտիկ։
