22.01.2026 | 17:27
Ջոկովիչը մտածում է «Մեծ սաղավարտի» 25-րդ տիտղոսի մասին․ «Հավատում եմ իմ ուժերին»
«Դատական օրենսգրքից» հանվել է փաստաբաններին մինչև 100 հազար դրամով տուգանելու դրույթը. ին՞չ է որոշել Դավիթ Հարությունյանը
Հասարակություն
31.01.2018 | 12:04
Առաջին ընթերցմամբ ընդունված «Դատական օրենսգիրքը» ենթարկվել է մի շարք փոփոխությունների: Այսօր ԱԺ պետաիրավական և մարդու իրավունքների պաշտպանության հարցերի մշտական հանձնաժողոովի նիստում տեղեկացրեց արդարադատության նախարար Դավիթ Հարությունյանը ՝ դրանցից առանձնացնելով 12 հիմնական փոփոխություն:
«Նախևառաջ Վճռաբեկ դատարանի կողմից բողոքների քննության և որոշումների ընդունման քվորումների համար սահմանվել է նույն շեմը՝ խոսքը Վճռաբեկ դատարանի պալատի դատավորների ընդհանուր թվի մեծամասնության մասին է: Նախկինում 2/3 էր նախատեսված, ինչն ավելի բարձր շեմ էր և ավելի էր սահմանափակում վճռաբեկ բողոք բերելու հնարավորությունը, շեմը իջեցվել է կեսի: Երկրորդ՝ նախատեսվել է առանձնահատուկ կարգ Վճռաբեկ դատարանի պալատի նախագահների և Վճռաբեկ դատարանի նախագահի համար: Բացի այդ, նախատեսվում է ավելացնել դատավորների թվաքանակը 12-ով, երկուսը մարզերի դատարաններում, դա տեղի կունենա 2019 թվականի հունվարի 1-ից՝ Արարատի և Արմավիրի մարզերում, երկուսը՝ Վերաքննիչ քրեական դատարանում: Հաշվի առնելով այն ծանրաբեռնվածությունը, որն այսօր առկա է , դա տեղի կունենա հիմա, և 8-ը սնանկության՝ Երևան քաղաքի դատարաններում, որը ևս տեղի կունենա 2019 թվականի հունվարի 1-ից, երբ կսկսի գործել մասնագիտացված սնանկության դատարանը»,- մանրամասնեց նախարարը:
Դավիթ Հարությունյանը նաև հայտնեց, որ «Դատական օրենսգրքից» հանվել են դատական սանկցիաների շարքից մեծ աղմուկ բարձրացրած դատական տուգանքների վերաբերյալ կարգավորումները:
«Այդ հարցը մենք կկարգավորենք շատ շուտով, որը ձեզ կներկայացնենք դատավարական օրենսգրքերում: Կարող է հարց առաջանալ՝ ինչո՞ւ մենք որոշեցինք դատական տուգանքը հանել Դատական օրենսգրքից՝ տեղափոխելով այն դատավարական օրենսգրքեր: Բանն այն է, որ նմանատիպ միջոցները, դրանք իհարկե, կոշտ միջոցներ են, կարող է պատահի՝ պրակտիկան ցույց տա, որ մենք այդտեղ պետք է լրացուցիչ որոշակի մեխանիզմներ ներդնենք, ինչը սահմանադրական օրենքի մակադրակով կարգավորելու դեպքում շատ ավելի դժվար կլինի անել, քան եթե դա կարգավորենք դատավարական օրենսգրքերով»,- նշեց Դավիթ Հարությունյանը:
Նախարարի փոխանցմամբ՝ առաջիկա օրերին կներայացվի երեք դատավարական օրենսգրքերում փոփոխությունների նախագիծ, որտեղ դատական տուգանքի կարգավորումները նույն կերպ կներդրվեն, ինչպես կային առաջին ընթերցմամբ ընդունված «Դատական օրենսգրքում»:
Հիշեցնենք՝ նշված կարգավորումները, որոնք տեղ էին գտել «Դատական օրենսգրքի» նոր նախագծում, թույլ էին տալիս փաստաբանների ու դատախազների նկատմամբ որպես սանկցիա կիրառել տուգանք մինչև 100 հազար դրամի չափով:
Շողիկ Գալստյան
