Վրաստանի նախագահ է ընտրվել ազգային հավաքականի նախկին ֆուտբոլիստ Միխայիլ Կավելաշվիլին

Վրաստանի նախագահ է ընտրվել Միխայիլ Կավելաշվիլին, որը նախկինում երեք անգամ եղել է երկրի խորհրդարանի պատգամավոր, իսկ ավելի վաղ հանդես է եկել ֆուտբոլի ազգային հավաքականում։ «Արմենպրես»-ի հաղորդմամբ՝ այս մասին հայտնում են վրացական և միջազգային լրատվամիջոցները։

Դեկտեմբերի 14-ին կայացած նախագահական ընտրությունները Վրաստանում առաջին անգամ անցկացվեցին ոչ թե ուղիղ, այլ 300 հոգուց բաղկացած ընտրական կոլեգիայի անդամների քվեարկությամբ։ Գործող իշխանություններին ոչ լեգիտիմ համարող ընդդիմադիր կուսակցությունների ներկայացուցիչներն ընտրությանը չմասնակցեցին։

Ընտրության ընթացքն ապահովող Վրաստանի Կենտրոնական ընտրական հանձնաժողովը քվեարկության արդյունքներն ամփոփելուց հետո հայտարարել է, որ Միխայիլ Կավելաշվիլին Վրաստանի նախագահ է ընտրվել 224 ընտրողների ձայնով։ Այդ պաշտոնին Միխայիլ Կավելաշվիլիին նոյեմբերի վերջին առաջադրել էր իշխող «Վրացական երազանք» կուսակցությունը։

Միխայիլ Կավելաշվիլին 53 տարեկան է։ Նա նախկինում հայտնի ֆուտբոլիստ է եղել ազգային հավաքականի կազմում՝ հարձակվող։ 1987-2006 թվականներին հանդես է եկել Թբիլիսիի «Դինամո»-ում, Վլադիկավկազի «Ալանիա»-ում, անգլիական «Մանչեսթեր Սիթի»-ում և շվեյցարական մի քանի ակումբներում։ Վրաստանի ազգային հավաքականում անցկացրել է 46 խաղ՝ դառնալով 9 գոլի հեղինակ։ Դրանցից մեկը 1997 թվականի մարտի 30-ի խաղում խփել է Հայաստանի հավաքականի դարպասը։ 2018 թվականից եղել է «Վրացական երազանք» կուսակցությունից առաջադրված պատգամավոր։ Նոր նախագահի երդմնակալության արարողությունը նախատեսված է դեկտեմբերի 29-ին։