Կաթնամթերքում հայտնաբերված մանրէների ոչ բոլոր տեսակներն են վտանգավոր․ ՍԱՏՄ-ն՝ Փաշինյանի հանձնարարությունից հետո

Սննդամթերքի անվտանգության տեսչական մարմինը պարզաբանում է ներկայացրել հայկական կաթնամթերքում հայտնաբերված մանրէաբանական անհամապատասխանությունների վերաբերյալ՝ նշելով, որ աղիքային ցուպիկի խմբի ոչ բոլոր մանրէներն են հիվանդածին, իսկ վերջին շրջանում կաթնամթերքում առողջական խնդիրներ առաջացնող որոշ շտամներ չեն հայտնաբերվել։

ՍԱՏՄ-ի նոր պարզաբանման համաձայն՝ աղիքային ցուպիկի խմբի մանրէների առկայությունը կարող է վկայել արտադրանքի աղտոտման, սանիտարահիգիենիկ պայմանների անբավարարության կամ մաքրման ու ախտահանման թերությունների մասին։ Միաժամանակ, գերատեսչությունը հայտնում է, որ վերջին շրջանում սննդամթերքով պայմանավորված զանգվածային թունավորումների դեպքեր չեն արձանագրվել։

ՍԱՏՄ-ի հաղորդագրությունը՝ ստորև․

«Սննդամթերքի անվտանգության տեսչական մարմինը մշտապես ուշադրության կենտրոնում է պահում հանությունից եկող դիտարկումներն ու անհանգստությունները, արագորեն արձագանքում է և տալիս իր գործառույթներից բխող լուծումներ:

Անդրադառնալով հայրենական կաթնամերքի անվտանգության շուրջ վերջին շաբաթվա ընթացքում հանրային քննարկումներին՝ տեղեկացնում ենք ևս մեկ անգամ, որ կաթնամթերք արտադրող ու իրացնող կազմակերպություններում Տեսչական մարմինը պարբերաբար անցկացնում է վերահսկողական միջոցառումներ, հայտնաբերված սանիտարահիգիենիկ խախտումների ու մանրէաբանական անհամապատասխանությունների մասին արվում է պատշաճ հանրային իրազեկում:
Հանրային քննարկումը կենտրոնացած է հիմնականում մանրէաբանական ԱՑԽՄ (աղիքային ցուպիկի խմբի մանրէներ) ցուցանիշի վրա, որը համարվում է երկրորդային աղտոտման հետևանք:

Տեղեկացնենք, որ Սննդամթերքի անվտանգության տեսչական մարմինը սերտորեն համագործակցում է պետական բոլոր կառույցների, այդ թվում՝ ՀՀ առողջապահության նախարարությանը ենթակա Հիվանդությունների վերահսկման և կանխարգելման ազգային կենտրոն ՊՈԱԿ-հետ:

ՀՎԿԱԿ-ը հստակեցրել է, որ ԱՑԽՄ-ի առկայությունը կարող է վկայել մանրէային աղտոտման, սանիտարահիգիենիկ պայմանների անբավարարության, ինչպես նաև մաքրման և ախտահանման գործընթացների հնարավոր թերությունների մասին։ ԱՑԽՄ խմբի ոչ բոլոր մանրէներն են ախտածին: Դրանց մի մասը բնականորեն հանդիպում է մարդու և կենդանիների աղիքային միկրոֆլորայում, ինչպես նաև շրջակա միջավայրում՝ առանց պարտադիր հիվանդություն առաջացնելու։
Միաժամանակ, այդ խմբի առանձին որոշ շտամներ կարող են առաջացնել առողջական խնդիրներ, որոնք, սակայն, կաթնամթերքի մեջ վերջին շրջանում չեն հանդիպել և սննդի գործոնով պայմանավորված զանգվածային թունավորման դեպքեր չեն արձանագրվել:

Սպառողների անվտանգության ապահովումն առաջնահերթությունն է, պատկան մարմիններն անում են հնարավորը հանրության առողջությունը վտանգներից հեռու պահելու համար, աշխատում են հրապարակային և թափանցիկ՝ արագ հանրայնացնելով սննդամթերքի անվտանգության ոլորտում հայտնաբերված ցանկացած խնդիր»:

Հիշեցնենք՝ նոյեմբերի 5-ին լրագրողների հետ ճեպազրույցում վարչապետ Նիկոլ Փաշինյանն անդրադարձել էր «Իրազեկ և պաշտպանված սպառող» ՀԿ-ի ուսումնասիրությանը, որի շրջանակում 11 արտադրողի կաթնամթերքի նմուշներում մանրէաբանական շեղումներ էին հայտնաբերվել։ Փաշինյանը հանձնարարել էր ՍԱՏՄ-ին պարզաբանել արդյունքները՝ միաժամանակ նշելով, որ սննդամթերքի՝ սահմանված չափանիշներին չհամապատասխանելը դեռ չի նշանակում, թե այն անպայման վտանգավոր է առողջության համար։

«Նշված կաթնամթերքներից էլ եմ օգտագործել վերջին երկու օրերին։ Դե ի՞նչ անեմ, ո՞նց մեր ժողովուրդը, նենց էլ ես։ Մտահոգվելու ի՞նչ կա»,- ասել էր վարչապետը։