Մենք հասել ենք մի տեղ, երբ ջեբկիրներին անվանում ենք ժողովուրդ. Աղվան Վարդանյան

2017 թվականին Հայաստանի համար տեղի ունեցան երկու կարևոր իրադարձություններ. մեկը՝ խորհրդարանական ընտրությունները, մյուսը՝ Հայաստան-Եվրամիություն Համապարփակ և ընդլայնված գործընկերության համաձայնագիրը: Factor.am-ի հետ զրույցում ամփոփելով տարին՝ հայտարարեց ԱԺ ՀՅԴ խմբակցության քարտուղար Աղվան Վարդանյանը:

«Խորհրդարանական ընտրություններն ավարտվեցին, և քաղաքական ուժերն առանց ցնցումների, առանց մեծ բողոքների ընդունեցին ընտրությունների արդյունքները և այսօր խորհրդարանում են: Հետաքրքիր է, որ այս ընտրություններին մեր հանրությունը մերժեց երկու ուղղություն. մեկը՝ չպատճառաբանված, չափից ավելի ամբոխահաճությունն էր, պոպուլիզմը, մյուսը՝ մեր ազգային պետական հարցրերում որոշակի զիջողականությունը: Այդ գաղափարներով ասպարեզ եկած ուժերը չանցան խորհրդարան»,- նշեց ՀՅԴ խմբակցության քարտուղարը:

Ինչ վերաբերում է Եվրամիության հետ համաձայնագրի ստորագրմանը, Աղվան Վարդանյանն ասաց՝ ԵՏՄ-ին անդամակցելուց հետո Հայաստանը եվրոպացիների համար խորթ զավակի կարգավիճակում էր հայտնվել: «Մեր արտաքին քաղաքականության աշխատանքի արդյունքում կարողացանք բալանսավորել արտաքին քաղաքականությունը, և Եվրամիության հետ համաձայնագիր կնքել, ինչը ենթադրում է և նաև պարտավորություն է մեզ համար Հայաստանում իրականացնել որակական բարեփոխումներ ժողովրդավարության, կոռուպցիայի դեմ պայքարում, ստեղծել դատական անկախ համակարգ: Եվ, ի վերջո, ստեղծել եվրոպական արժեհամակարգին համապատասխանող պետություն»,- շարունակեց պատգամավորը:

Ըստ նրա՝ վերը թվարկված հարցերն անհնար է լուծել առանց տնտեսության զարգացման. «Գոհունակությամբ պետք է նշեմ, որ կառավարության գործունեության արդյունքում մենք ունենք էական փոփոխություններ, էական այս փուլի համար: Անցած տարին մենք փակել ենք 0.2 տոկոս տնտեսական աճով, այս տարի, ամենայն հավանականությամբ, տնտեսական աճը կլինի 6, 6.5 գուցե ավելին»:

Պատգամավորի կարծիքով՝ թեև կառավարությունը լարված աշխատել է, սական դժգոհողների մի շրջանակ կա, որը ցանկացած պարագայում դժգոհելու է: «Մենք պետք է կարողանանք հասարակության մեջ լավատեսական սպասումներ առաջացնել, արթնացնել և ցույց տալ՝ ինչ էր և ինչ է փոխվում: Եթե փոքր տեղաշարժերը չգնահատենք, ապա միշտ կմնանք մի վիճակում, որ ամեն բան կմերժենք»,- ընդգծեց Աղվան Վարդանյանը՝ հավելելով. «Մենք հասել ենք մի տեղ, երբ արդարացնում ենք գրպանահատներին: Այսինքն՝ հոգեբանական այնպիսի մի վիճակի մեջ ենք հայտնվել, որ ջեբկիրներին անվանում ենք ժողովուրդ»:

Հարցազրույցն ամբողջությամբ՝ տեսանյութում:

Շողիկ Գալստյան