Չինաստանը մարդանման ռոբոտներ կտեղակայի Վիետնամի սահմանին պարեկության համար

Չինական UBTech Robotics ընկերությունը 264 միլիոն յուանի (37 միլիոն ԱՄՆ դոլար) պայմանագիր է կնքել Գուանսի նահանգի սահմանային անցակետերում արդյունաբերական կարգի մարդակերպ ռոբոտներ տեղակայելու համար, ինչն ընդլայնում է երկրի ջանքերը ռոբոտաշինությունը հանրային և արդյունաբերական միջավայրերում կիրառելու ուղղությամբ: Մատակարարումները նախատեսվում է սկսել դեկտեմբերին:

Համաձայնագիրը ստորագրվել է Վիետնամին սահմանակից ափամերձ Ֆանչենգանգ քաղաքում գտնվող մարդանման ռոբոտների կենտրոնի հետ։ Տեղակայումը կներառի UBTech-ի Walker S2 մոդելը, որը թողարկվել է հուլիսին և նկարագրվել է որպես աշխարհի առաջին մարդանման ռոբոտը, որը կարող է ինքնուրույն փոխարինել իր սեփական մարտկոցը։

Նշվում է, որ փորձնական ծրագրի շրջանակում Walker S2 ռոբոտներ կտեղակայվեն սահմանային անցակետերում՝ ճանապարհորդներին ուղղորդելու, անձնակազմի հոսքը կառավարելու, պարեկային պարտականություններին օգնելու, լոգիստիկ առաջադրանքներ կատարելու և առևտրային ծառայություններին աջակցելու համար: Բացի ներգաղթի հետ կապված գործողություններից՝ ռոբոտները կօգտագործվեն նաև պողպատի, պղնձի և ալյումինի արտադրական վայրերում ստուգումներ անցկացնելու համար: Գործարքը արտացոլում է Չինաստանի կողմից արհեստական ​​բանականության առևտրայնացման ավելի լայն ջանքերի արագացումը։

Նմանատիպ ռոբոտներ տեղակայվել են նաև օդանավակայաններում, կառավարական գրասենյակներում և խոշոր միջոցառումների ժամանակ։

Walker S2-ի դիզայնը հիմնված է խելացի արտադրության և լոգիստիկայի վրա։ UBTech-ը ռոբոտը նկարագրում է որպես արդյունաբերական մակարդակի մարդակերպ, որը նախատեսված է բարձր աշխատանքային ժամանակի և բարդ մանիպուլյացիոն առաջադրանքների համար։ Մոտավորապես 1,76 մետր բարձրությամբ Walker S2-ն առանձնանում է բարձր ճկունությամբ։

Ռոբոտը կարող է մեկ ձեռքում մինչև 15 կիլոգրամ (33 ֆունտ) բեռ կրել գետնից մինչև 1,8 մետր երկարությամբ աշխատանքային տարածքում:

UBTech-ը հայտնել է, որ Walker շարքի համախառն պատվերները հասել են 1,1 միլիարդ յուանի (115 միլիոն ԱՄՆ դոլար)՝ այս ամսվա մատակարարումների սկսվելուց ի վեր։ Ընկերությունը նպատակ ունի մինչև տարեվերջ մատակարարել 500 արդյունաբերական մարդակերպ և հաջորդ տարի տասնապատկել արտադրությունը՝ երկարաժամկետ կտրվածքով նպատակ ունենալով մինչև 2027 թվականը տարեկան արտադրել 10,000 միավոր։

Չինաստանի արդյունաբերության և տեղեկատվական տեխնոլոգիաների նախարարությունը վերջերս պաշտոնապես ձևավորել է ազգային մարդակերպ ռոբոտաշինության կոմիտե, ինչը վկայում է ոլորտի արագ զարգացման մասին։

Թարգմանությունը՝ Էմմա Չոբանյանի