09.06.2026 | 12:10
Նորընտիր ԱԺ-ի առաջին նիստը՝ օգոստոսի 2-ին // ԵՄ-ն՝ ՀՀ-ի դեմ Մոսկվայի հիբրիդային հարձակումների մասին․ ԼՈՒՐԵՐ
Վերջնական որոշում չկա. Բայրամովը՝ Ադրբեջանի կողմից Գազա զորակազմ ուղարկելու մասին
Քաղաքականություն
08.12.2025 | 23:14
Ադրբեջանը հրավեր է ստացել՝ մասնակցելու Գազայում միջազգային կայունացման ուժերին, սակայն վերջնական որոշում դեռևս չի կայացվել։ Այս մասին հայտարարել է Ադրբեջանի արտաքին գործերի նախարար Ջեյհուն Բայրամովը իրանցի գործընկեր Աբբաս Արաղչիի հետ համատեղ մամուլի ասուլիսում։
Նա նշել է, որ Գազայում տեղի ունեցող զարգացումները լուրջ մտահոգության տեղիք են տալիս.
«Այս համատեքստում մենք դրական ենք ըմբռնել Միացյալ Նահանգների կողմից ներկայացված խաղաղության ծրագիրը։ Հետագայում ընդունվեցին ՄԱԿ-ի Անվտանգության խորհրդի բանաձևեր, և Ադրբեջանն աջակցություն հայտնեց դրանց։ Ադրբեջանն այն քիչ երկրներից է, որը լավ հարաբերություններ ունի բոլոր պետությունների հետ և վայելում է նրանց վստահությունը։ Մենք դիմումներ ենք ուղարկել համապատասխան մարմիններին հետաքրքրող հարցերի վերաբերյալ։ Կան տարբեր ասպեկտներ, այդ թվում՝ մանդատը, այլ պետությունները և այլն։ Մենք դեռևս չենք ստացել մեր բարձրացրած հարցերի համապարփակ պատասխանները։ Հետևաբար, ներկայում վերջնական որոշում չկա այս առաքելությանն ադրբեջանական զորակազմի մասնակցության վերաբերյալ»,- ասել է Բայրամովը։
Ադրբեջանի կառավարության աղբյուրն ավելի վաղ հայտնել էր, որ Բաքուն չի ծրագրում խաղաղապահներ ուղարկել Գազա, քանի դեռ Իսրայելի և ՀԱՄԱՍ-ի միջև մարտական գործողությունները լիովին չեն դադարեցվել։
Թարգմանությունը՝ Էմմա Չոբանյանի
