Իսրայելը Լիբանանում ցամաքային գործողություն է սկսել՝ նոր «ռազմավարական տարածքներ» գրավելու համար. լիբանանյան բանակը լքում է դիրքերը

Իսրայելի պաշտպանության նախարար Իսրայել Կացը հայտարարել է, որ երկրի զինված ուժերը վարչապետից հրաման են ստացել հարձակում սկսել և գրավել Լիբանանում լրացուցիչ ռազմավարական տարածքներ, գրում է BBC-ի ռուսական ծառայությունը։

«Այս գործողությունները նպատակ ունեն կանխել Իսրայելի սահմանային շրջանների վրա հարձակումները։ Մենք խոստացել ենք ապահովել Գալիլեայի շրջանների անվտանգությունը, և դա կարվի»,- ասել է Կացը։

Իրանի վրա հարվածներին ի պատասխան՝ լիբանանյան «Հըզբոլլահ» խմբավորումը սկսել է ռմբակոծել Իսրայելը։ Իսրայելական բանակը պատասխան հարվածներ է հասցրել մայրաքաղաք Բեյրութին և այլ քաղաքներին։

2024 թվականին Իսրայելը և Լիբանանը, ԱՄՆ-ի միջնորդությամբ, համաձայնել էին հրադադարի՝ մեկ տարուց ավելի տևած բախումներից հետո, որոնք զգալիորեն թուլացրել էին «Հըզբոլլահի» դիրքերը։ «Հըզբոլլահի» հարվածները Իսրայելին առաջին հարձակումն էին 2024 թվականից ի վեր, մինչդեռ Բեյրութի հարավային արվարձաններին հասցված Իսրայելի հարվածները ամենաուժեղն էին 2023-2024 թվականների հակամարտությունից ի վեր։

Բացի այդ, լիբանանցի պաշտոնյան հայտնել է, որ իսրայելական զորքերը ներխուժումներ են իրականացրել Լիբանանի սահմանի որոշ հատվածներում։ Ականատեսները հաղորդել են, որ Լիբանանի բանակը նահանջել է սահմանի երկայնքով տեղակայված առնվազն յոթ առաջխաղացման դիրքերից։

Լիբանանի պետական ​​National News Agency -ն հաղորդել է, որ լիբանանյան բանակը լքում է Իսրայելի սահմանի երկայնքով գտնվող «առաջնային դիրքերը»։

Թարգմանությունը՝ Էմմա Չոբանյանի