20.10.2026 | 23:17
COP17-ի շրջանակում քննարկվել է ավանդական գիտելիքի դերը կենսաբազմազանության պահպանության գործում
Ակնկալում ենք, որ խորհրդարանական ընտրություններում միանշանակ հաղթանակ կտանենք. Նիկոլ Փաշինյան
Քաղաքականություն
22.10.2018 | 11:27
Ակնկալում ենք, որ խորհրդարանական ընտրություններում միանշանակ հաղթանակ կտանենք: Այս մասին այսօր՝ հոկտեմբերի 22-ին, լրագրողների հետ զրույցում հայտարարեց ՀՀ վարչապետի պաշտոնակատար Նիկոլ Փաշինյանը:
«Մենք ակնկալում ենք, որ խորհրդարանական ընտրություններում միանշանակ հաղթանակ կտանենք, ակնկալում ենք, որ ժողովուրդն այդ վստահության քվեն կտա: Բայց մենք չենք կենտրոնանում մեր սեփական իշխանության վրա, այլ կենտրոնանում ենք ժողովրդի իշխանության վրա»,- հավելեց Փաշինյանը:
Նա դեռևս վաղ է համարում կանխատեսել, թե արտահերթ խորհրդարանական ընտրությունների արդյունքում «Քաղաքացիական պայմանագիր» կուսակցությունը քանի տեղ կունենա Ազգային ժողովում. «Որոշումը կայացնում են ընտրողները, և դրանում, այսպես ասած, ոչ մի ձև չկա: Մեր խնդիրը չի եղել, չի և չի լինելու իշխանությունը պահելը: Մեր խնդիրը ժողովրդի իշխանությունը պահելն է, ինչը չի նշանակում, որ մենք այդ հայտը չենք ներկայացնելու»:
Ինչ վերաբերում է հոկտեմբերի 21-ին տեղի ունեցած ՏԻՄ ընտրություններին, ապա Կապանում իրենց սատարած թեկնածուի պարտությունը Նիկոլ Փաշինյանը չի կապում Սյունիքի մարզպետի նշանակման պատճառով առաջացած դժգոհության հետ:
«Ցավում եմ, որ Նարեկ Բաբայանը պարտվել է, որ մենք ընտրություններում պարտություն ենք կրել: Բայց մյուս կողմից ուրախ եմ, որ մենք ևս մեկ քայլ կատարեցինք՝ արձանագրելու մեր հավատարմությունը թավշյա հեղափոխության արժեքներին: Ինչպես նախկինում ասել եմ, հիմա էլ ասում եմ, որ Հայաստանում ընտրությունների արդյունքները չեն կեղծվելու: Աներկբա է, որ բոլոր տեղերում ընտրությունների պաշտոնական արդյունքներն արտահայտում են մարդկանց ընտրությունը»,- նշեց վարչապետի պաշտոնակատարը:
