05.12.2025 | 23:32
ԱԱ․ Բաչկովը հաղթել է ժամկետից շուտ, Մաշակարյանը և Հովհաննիսյանը ևս շարժվում են առաջ
Ադրբեջանն ու Իրանը համատեղ զորավարժություններ են անցկացնում․ ՏԵՍԱՆՅՈՒԹ
Քաղաքականություն
19.05.2025 | 11:13
Ադրբեջանն ու Իրանը Արցախի տարածքներում մայիսի 18-ից համատեղ զորավարժություններ են սկսել։ Ադրբեջանի ՊՆ-ի հաղորդմամբ՝ զորավարժություններին մասնակցող իրանական անձնակազմի ղեկավարը և մյուս մասնակիցները նախօրեին Ադրբեջան են ժամանել՝ «Արաքս-2025» համատեղ զորավարժություններին մասնակցելու համար։ Հաղորդվում է, որ տեղի է ունեցել հանդիպում զորախմբերի ղեկավարների և երկու երկրների այլ բարձրաստիճան ներկայացուցիչների միջև։
Հանդիպմանը ներկայացվել է զորավարժության նպատակների, սցենարի և անցկացման վայրի, նախապատրաստման գործընթացի, անվտանգության կանոնների և տարբեր փուլերում կատարվելիք առաջադրանքների վերաբերյալ համառոտ տեղեկատվություն։
Իրանական Mehr գործակալությունն էլ հայտնում է, որ Իսլամական հեղափոխության պահապանների կորպուսի (ԻՀՊԿ) ցամաքային ուժերը և Ադրբեջանի բանակի հատուկ նշանակության ուժերը սկսել են «Արաքս-2025» խորագրով համատեղ զորավարժությունները։ Բրիգադի գեներալ, ԻՀՊԿ ցամաքային ուժերի գործողությունների փոխհրամանատար և համատեղ զորավարժությունների ղեկավար Վալի Մադանին հայտարարել է, որ ԻՀՊԿ հատուկ նշանակության ուժերը Ադրբեջանի տարածք են մտել Իրանի Արդաբիլ նահանգի Բիլեհ-Սավար ցամաքային սահմանային անցակետով՝ զորավարժություններին մասնակցելու համար։ Նա ընդգծել է, որ համատեղ զորավարժությունները նշանակալի քայլ են ընդհանուր սահմանների երկայնքով անվտանգության ամրապնդման և հնարավոր սպառնալիքներին հակազդելու ուղղությամբ։
Զորավարժությունները սկսվել են մայիսի 18-ին և կշարունակվեն մինչև մայիսի 21-ը։ Թե կոնկրետ որ տեղանքում են անցկացվում վարժանքները, չի հաղորդվում։
Հիշեցնենք, որ Իրանն ու Ադրբեջանը 2024 թ-ի նոյեմբերին էին համատեղ զորավարժություններ անցկացրել։
Այս տարվա ապրիլին էլ Իրանի ԶՈՒ հատուկ նշանակության ստորաբաժանումները ՀՀ-ի հետ էին համատեղ զորավարժություն անցկացրել։
Թարգմանությունը՝ Էմմա Չոբանյանի
