05.11.2026 | 00:08
Ինչ է որոշել ընդդիմությունը. Նարեկ Կարապետյանը հանդիպումից հետո մանրամասներ հայտնեց. ՏԵՍԱՆՅՈՒԹ
Բայրամովն ԱՄՆ հատուկ ներկայացուցչի ավագ խորհրդականի հետ քննարկել է TRIPP-ը
Քաղաքականություն
06.10.2026 | 18:19
Ադրբեջանի արտաքին գործերի նախարար Ջեյհուն Բայրամովն ընդունել է ԱՄՆ հատուկ ներկայացուցչի՝ խաղաղապահ առաքելությունների հարցերով ավագ խորհրդական Արի Լայթսթոունին։ Ադրբեջանի ԱԳՆ-ից հայտնել են, որ հանդիպման ընթացքում մտքեր են փոխանակվել Ադրբեջանի և ԱՄՆ-ի միջև երկկողմ հարաբերությունների ներկա վիճակի և զարգացման հեռանկարների, ինչպես նաև տարածաշրջանային հարցերի շուրջ։
Ջեյհուն Բայրամովը նշել է 2025 թվականի օգոստոսի 8-ին Վաշինգտոնում կայացած պատմական գագաթնաժողովի նշանակությունը՝ ադրբեջանա-ամերիկյան հարաբերությունները ռազմավարական գործընկերության մակարդակի բարձրացնելու գործում։ Նշվել է, որ Վաշինգտոնում ձեռք բերված պայմանավորվածություններից հետո երկկողմ կապերի տարբեր ուղղություններով արագ զարգացումը գոհունակություն է առաջացնում։ Այս համատեքստում ընդգծվել է 2026 թվականի փետրվարի 10-ին Ադրբեջանի և Ամերիկայի Միացյալ Նահանգների միջև ստորագրված Ռազմավարական գործընկերության խարտիայի կարևորությունը՝ երկկողմ կապերի ինստիտուցիոնալ հիմքերի հետագա ամրապնդման և համագործակցության նոր ուղղությունների սահմանման տեսանկյունից։
Քննարկվել են Խարտիայի իրականացման շրջանակում ստեղծված աշխատանքային խմբերի գործունեությունը, ինչպես նաև առաջիկա ժամանակահատվածում կոնկրետ նախագծերի և ճանապարհային քարտեզների սահմանման ուղղությամբ իրականացվող աշխատանքները։
Անդրադարձ է կատարվել ադրբեջանա-ամերիկյան տնտեսական և էներգետիկ համագործակցության ընդլայնման հարցերին։ Այս համատեքստում նշվել է Բաքվի էներգետիկ շաբաթվա և «Ադրբեջանի II միջազգային ներդրումային ֆորումի» շրջանակում էներգետիկայի, ներդրումների, բարձր տեխնոլոգիաների և այլ ոլորտներում ձեռք բերված պայմանավորվածությունների ներդրումը երկկողմ ռազմավարական գործընկերության տնտեսական հիմքերի ամրապնդման գործում։Ներկայացվել է տեղեկատվություն Ադրբեջանի կողմից իրականացվող ենթակառուցվածքային նախագծերի վերաբերյալ, որոնք ուղղված են տարածաշրջանի էներգետիկ, տրանսպորտային և լոգիստիկ ներուժի զարգացմանը, Միջին միջանցքի ընդլայնմանը, ներդրումների խթանմանը և տարածաշրջանային կապերի ամրապնդմանը։
Ընդգծվել է, որ TRIPP նախագիծը կարևոր ներդրում կունենա տարածաշրջանում տրանսպորտային և տնտեսական կապերի զարգացման, Ադրբեջանի տարածքով նրա Նախիջևանի ինքնավար հանրապետության հետ անխոչընդոտ հաղորդակցության ապահովման և տարածաշրջանային ավելի լայն տարանցիկ հնարավորությունների ձևավորման գործում։
Հանդիպման ընթացքում մտքեր են փոխանակվել նաև հայ-ադրբեջանական հարաբերությունների կարգավորման գործընթացի վերաբերյալ։
Ըստ ադրբեջանական կողմի հաղորդագրության՝ Բայրամովն իր զրուցակցին տեղեկացրել է խաղաղության օրակարգի առաջմղման, ձեռք բերված պայմանավորվածությունների իրականացման, տարածաշրջանային հաղորդակցությունների բացման, ինչպես նաև տարածաշրջանում կայուն խաղաղության և անվտանգության ամրապնդման ուղղությամբ Ադրբեջանի ձեռնարկած քայլերի մասին և ներկայացրել իր երկրի դիրքորոշումը։
Կողմերն ընդգծել են փոխադարձ հետաքրքրություն ներկայացնող բոլոր ուղղություններով ադրբեջանա-ամերիկյան ռազմավարական գործընկերության հետագա զարգացմանն ուղղված ջանքերի շարունակման և ձեռք բերված պայմանավորվածությունները գործնական արդյունքներով համալրելու կարևորությունը։
Թարգմանությունը՝ Էմմա Չոբանյանի
