Իրանը հայտարարել է, որ կօգտվի Իսրայելին պատասխան տալու իր իրավունքից

Իրանը, հիմնվելով ՄԱԿ-ի կանոնադրության վրա, իրեն պարտավորված է համարում արձագանքել Իրանի տարածքի վրա Իսրայելի հարձակմանը։ Այս մասին ասված է Իրանի Իսլամական Հանրապետության արտաքին գործերի նախարարության հայտարարության մեջ․ փոխանցում է ՏԱՍՍ-ը։

«Իրանի Իսլամական Հանրապետության արտաքին գործերի նախարարությունը խստորեն դատապարտում է Սիոնիստական ​​ռեժիմի ագրեսիվ գործողությունները Իրանի մի շարք ռազմական կենտրոնների դեմ և դրանք համարում է միջազգային իրավունքի և ՄԱԿ-ի կանոնադրության բացահայտ խախտում, այն է՝ այլ երկրների տարածքային ամբողջականության կամ քաղաքական անկախության դեմ ուժի սպառնալիքից կամ ուժի կիրառումից զերծ մնալու սկզբունքը»,- ասված է հայտարարության մեջ։

Հայտարարությունում նաև ասվում է, որ «Իրանը, ելնելով օրինական պաշտպանության իր անօտարելի իրավունքից, որն արտացոլված է նաև ՄԱԿ-ի կանոնադրության 51-րդ հոդվածում, իրեն վերապահում է արտաքին ագրեսիայի գործողություններից պաշտպանվելու իրավունք և պարտավորություն»:

Մինչդեռ նշենք, որ որ ԱՄՆ վարչակազմի բարձրաստիճան պաշտոնյա Ջոնաթան Երուշալմին, ասել էր, որ ԱՄՆ-ը Իրանի վրա Իսրայելի հարձակումը համարում է «Իսրայելի և Իրանի միջև փոխհրաձգության ավարտ։ Սրանով պետք է ավարտվի Իսրայելի և Իրանի միջև ռազմական փոխհրաձգությունը»։

Հիշեցնենք, որ Իսրայելի Պաշտպանության բանակը` Ցահալը, այս գիշեր հայտարարել էր Իրանում ռազմական օբյեկտների վրա պատասխան հարձակման մասին։ Ժամեր անց Իրանի ՀՕՊ ուժեը հայտարարություն էին տարածել, նշելով՝ հարձակումը հաջողությամբ կասեցվել և հետ է մղվել երկրի հակաօդային պաշտպանության  համակարգի կողմից․ «Որոշ վայրերում սահմանափակ վնաս է հասցվել: Միջադեպի չափը հետաքննվում է»։