Ես էսօրվա ձեր պահվածքը ձեր քթից հանելու եմ, սադրիչների դերում եք․ Նիկոլ Փաշինյանը՝ ընդդիմադիրներին. ՏԵՍԱՆՅՈՒԹ

Ազգային ժողովի հարցուպատասխանի ընթացքում լարված իրավիճակ ստեղծվեց պատգամավոր Հարություն Հարությունյանի և վարչապետ Նիկոլ Փաշինյանի միջև՝ Սյունիքի Շաքի գյուղում ադրբեջանցի զինծառայողի հայտնվելու, ԵԽԽՎ զեկույցի և հնարավոր արտահանձնման թեմաների շուրջ:

Հարությունյանն իր հարցադրման մեջ կասկածի տակ դրեց իշխանությունների համարձակությունը՝ Ալիևի պահանջով ադրբեջանցի զինծառայողին չհանձնելու վերաբերյալ: Նա նաև մատնանշեց ԵԽԽՎ զեկույցը, որտեղ, նրա փոխանցմամբ, արձանագրված են քաղաքական հետապնդումներ և ընտրովի արդարադատություն:

Անդրադառնալով Շաքիի միջադեպին՝ ընդդիմադիր պատգամավորը պնդեց․ «Մոլորված զինվորը 50 կմ չի խորանում, չի գնում մտնում հայ ընտանիքի, հայ օջախի տուն, չի մտնում խոհանոց, զենք չի պահում երեխեքի վրա․․․ Դուք հիմա զբաղվում եք ադրբեջանցի ահաբեկչի փաստաբանությամբ»։

Փաշինյանը, հակադարձելով մեղադրանքներին, հորդորեց «գողություն» բառն օգտագործելիս նայել սեփական միջավայրին: Խոսելով Շաքիում հայտնված ադրբեջանցու մասին՝ վարչապետը նշեց, որ նա ինքնակամ լքել է ծառայության վայրը և անցել սահմանը, որտեղ կատարել է հանցագործություն:

Փաշինյանն ընդգծեց, որ ընդդիմության հայտարարությունները վտանգում են ապագայում հնարավոր մոլորված հայ զինծառայողների ճակատագիրը․ «Ես սարսափով եմ մտածում այն օրվա մասին, երբ որ մեր մի զինվոր հանկարծ շփոթվի, մոլորվի, ձմեռ է, մառախուղ է, հայտնվի Ադրբեջանում․ այս մարդիկ այսօր ստեղծում են բոլոր հնարավոր պայմանները, որ այդ պոտենցիալ զինվորին Ադրբեջանում դարձնեն Ուսամա բեն Լադեն։

Ես այսօրվա ձեր պահվածքը ձեր քթից հանելու եմ․․․ Եթե, Աստված չանի, մեր մի զինվոր հայտնվեց այնտեղ, և այս ամեն ինչի արտահայտությունը մենք այդ զինվորի վրա տեսանք, այսօրվա ձեր ասած ամեն նախադասությունը քթներիցդ հանելու եմ․․․ Հենց ուղիղ սպառնալիք է»:

Վարչապետն ընդգծեց, որ անհատապես բոլորին հիշեցնելու է այդ օրվա հայտարարությունները:

Մանրամասները՝ տեսանյութում։

Եվգենյա Համբարձումյան