25.11.2024 | 22:33
Լոնդոնը ներկայացրել է ՌԴ «ստվերային նավատորմի» դեմ միջոցառումների ամենամեծ փաթեթը
Ադրբեջանի ԱԳՆ-ն չի մեկնաբանել երկրից իսրայելական զորքերի դուրսբերման մասին տեղեկությունները
Քաղաքականություն
12.08.2024 | 17:28
Ադրբեջանի ԱԳՆ-ն չի մեկնաբանել իսրայելական KAN հեռուստաալիքի հաղորդումները Ադրբեջանից իսրայելական զինվորականների դուրսբերման մասին՝ նրանց վրա Իրանի հարձակման սպառնալիքի պատճառով, գրում է ադրբեջանական Turan գործակալությունը։
Նշենք, որ Իրանը երկար ժամանակ է՝ պնդում է, որ Ադրբեջանում Իրանի հետ սահմանին ստեղծված են իսրայելական հետախուզական օբյեկտներ։ Պաշտոնական Բաքուն հերքում է այս պնդումները՝ հայտարարելով, թե թույլ չի տա իր տարածքից թշնակաման գործողություններ Իրանի ուղղությամբ։
Քուրդիստանում և Ադրբեջանում իսրայելական օբյեկտներին Իրանի հնարավոր հարվածի մասին տեղեկությունը հայտնվել է շաբաթ օրը՝ բրիտանական The Telegraph-ի հրապարակումից հետո։ Պարբերականը մեջբերել էր Իրանի նորընտիր նախագահ Փեզեշքիանի օգնականներից մեկին, որը հայտարարել էր, որ ավելի լավ է պայմանական հարված հասցնել իսրայելական թիրախներին իրաքյան Քուրդիստանում և Ադրբեջանում՝ նախապես զգուշացնելով այդ երկրների ղեկավարությանը, քան մեծ պատերազմ սկսել հենց Իսրայելի դեմ։
Հիշեցնենք, որ ավելի վաղ իսրայելական բանակն իր զինծառայողներին հրահանգել է հեռանալ Ադրբեջանից և Վրաստանից՝ Իրանի կողմից հարվածի սպառնալիքի ֆոնին։
Բանակային ղեկավարության հրամանի համաձայն՝ զինվորական ծառայության անցած իսրայելցիները, որոնք ինչ-որ պատճառներով գտնվում են այդ երկու հարավկովկասյան երկրներում, պարտավոր են անմիջապես վերադառնալ Իսրայել։ Kan-ը նշում է, որ Վրաստանն ու Ադրբեջանը գտնվում են Իրանին մոտ, այդ տարածքներում իրանցիներ են բնակվում, իսկ Ադրբեջանը նաև Իսլամական Հանրապետության հետ ընդհանուր սահման ունի։
