Հասարակություն
23.03.2023 | 18:38
Հակակոռուպցիոն կոմիտեում քննվող վարույթի շրջանակում ձերբակալված փաստաբան Լևոն Գևորգյանն ազատ է արձակվել։ Այս մասին հայտնում են իրավապահ համակարգում Factor.am-ի աղբյուրները։
Հայտնի չէ՝ այս պահի դրությամբ Գևորգյանին մեղադրանք առաջադրվա՞ծ է, թե՞ ոչ։
Հիշեցնենք, որ երեկ Ոստիկանությունը հայտնել էր, որ Պարեկային ծառայության աշխատակիցները Հրազդանի կիրճում ստուգում կատարելու նպատակով կանգնեցրել են «Տոյոտա» մակնիշի ավտոմեքենա, որի վարորդն իր մոտ չի ունեցել վարորդական իրավունքի վկայական, ինչի համար ուղևորը 40.000 դրամ է առաջարկել պարեկային ծառայողներին: Ուղևորը կաշառք տալու կասկածանքով ձերբակալվել և տարվել է Ոստիկանություն։
Քննչական կոմիտեից էլ հայտնել են, որ դեպքի առթիվ քրեական վարույթ է նախաձեռնվել Քրեական օրենսգրքի 436 հոդվածի 1-ին մասով և ուղարկվել Հակակոռուպցիոն կոմիտե։ Ըստ այս պահին շրջանառվող տեղեկությունների՝ ուղևորը եղել է հենց փաստաբան Լևոն Գևորգյանը։ Վերջինիս դիրքորոշումը՝ կապված դեպքի հետ, մեզ հայտնի չէ․ թեև փաստաբանն արդեն ազատության մեջ է, հեռախոսահամարներն անհասանելի են, և մեզ չի հաջողվել կապ հաստատել նրա հետ։
Արաքս Մամուլյան
