24.06.2026 | 17:49
ՀԱՊԿ-ից հայտարարել են, որ մանրակրկիտ կքննարկեն Հայաստանի անդամակցության հարցը
Մարտի 1-ի դեպքերով 74 քաղաքացի դրամական աջակցություն կստանա. բյուջեից կհատկացվի 720 միլիոն դրամ
Քաղաքականություն
04.09.2019 | 22:13
2008 թվականի մարտի 1-2-ին Երևան քաղաքում տեղի ունեցած իրադարձությունների ժամանակ զոհված քաղաքացիների ընտանիքների անդամներին եւ տարբեր աստիճանի վնասվածքներ ստացած քաղաքացիներին աջակցություն տրամադրելու համար պետական բյուջեից կհատկացվի 720 միլիոն դրամ:
Այս մասին Factor.am-ը տեղեկանում է կառավարությունում շրջանառվող որոշման նախագծից: Ընդհանուր առմամբ աջակցություն է տվելու 74 քաղաքացու: Նրանցից 10-ը զոհվածների իրավահաջորդներն են, 10-ն՝ առողջությանը ծանր վնաս ստացած անձիք են, իսկ 54-ն՝ առողջությանը միջին ծանրության վնաս ստացած անձիք։ Նկատենք, որ նախագծում բացակայում են դրամական աջակցություն ստացող քաղաքացիների անունները:
Ավելի վաղ գրել էինք, որ զոհված քաղաքացիների հարազատներին որպես աջակցություն անվագ կտրվի 30 մլն ՀՀ դրամ, առողջությանը ծանր վնաս հասցված անձին՝ 15 մլն ՀՀ դրամ, առողջությանը միջին ծանրության վնաս հասցված անձին՝ 5 մլն ՀՀ դրամ:
Հիշեցնենք, որ 2008 թվականի մարտի 1-2-ին Երևանում տեղի ունեցած հանրահավաքների արդյունքում զոհվեց 10 քաղաքացի. երկուսը՝ ոստիկան, ութը՝ ցուցարար: Ընդդիմության բողոքների նպատակը նախագահական ընտրությունների արդյունքները չեղարկելն էր: Տասը տարի շարունակ Մարտի 1-ի զոհերի հարազատներին պետական մակարդակով որևէ աջակցություն չի եղել: Միայն իշխանափոխությունից հետո վարչապետ Նիկոլ Փաշինյանը պետության անունից ներողություն խնդրեց զոհերի հարազատներից:
Հեղափոխությունից հետո Մարտի 1-ի գործի քննությունը նոր թափով վերսկսվեց։ Մարտի մեկի զոհերի հարազատներին եւ տարբեր աստիճանի վնասվածք ստացած քաղաքացիներին դրամական աջակցություն տալու օրենսդրական նախաձեռնության հեղինակներն ԱԺ փոխնախագահներ Ալեն Սիմոնյանը եւ Լենա Նազարյանն են:
Նարեկ Կիրակոսյան
