Ավելի կարևոր է սանձել մեր թիմակցին, եթե նա թաթախված է կոռուպցիայի մեջ, քան նախկիններին. Հրաչյա Հակոբյան. ՏԵՍԱՆՅՈՒԹ

Factor.am–ի զրուցակիցն է Ազգային ժողովի «Իմ քայլը» խմբակցության պատգամավոր Հրաչյա Հակոբյանը

 -Պարո՛ն Հակոբյան, հեղափոխությունից մեկ տարի անց վարչապետ Նիկոլ Փաշինյանը հայտարարում է, որ մարդկանց վերաբերմունքը ձեր նկատմամբ չի փոխվել, կիսո՞ւմ եք նրա տեսակետը:

-Եթե անգամ որոշ հատվածի վերաբերմունքը փոխվել է, ապա դա գալիս է նրանից, որ հեղափոխություններից հետո սպասումները շատ ավելին են, մարդիկ  կարճաժամկետ սպասումներ ունեն, որ օր առաջ իրենց սոցիալական վիճակը կլավանա: Գուցե նաև որոշ թիմերի հակաքարոզչության հետևանքով մի փոքր հատվածի վերաբերմունքն այլ լինի:

-Ի՞նչ թիմերի մասին է խոսքը:

-Մի քանի ուժ կա, որոնց կողմից ֆինանսավորվող խմբերը հակապետական քայլեր են անում, հայտարարություններ անում, որ երկիրը պատերազմի շեմին է, հողեր են հանձնում և այլն:

-Այսինքն՝ քաղաքացիներ, որոնք մեկ տարի առաջ ձեզ աջակցում էին, գումարի դիմաց այլ քայլերի՞ են դիմում:

-Ոչ, խոսքը նույն մարդկանց մասին չէ:

–Հարցս ձեզ աջակցողների մասին է, նրանց վերաբերմունքը չի՞ փոխվել:

-Մեծ հաշվով համաձայն եմ վարչապետի հետ, բայց, գուցե, լինեն շատ քիչ մարդիկ, որոնք, չասենք հիասթափված են, բայց, գուցե, այլ սպասելիքներ ունեին:

-Պնդում եք, որ երկրում շատ բան է փոխվել, բայց, օրինակ, քննադատում են ձեզ նախկին իշխանության գործելաոճի նմանության համար: Մի կողմից Փաշինյանն ասում է, որ «բաջանաղին գործի նշանակելու ժամանակներն անցել են», մյուս կողմից՝ իշխանության մտերիմները նշանակվում են բարձր պաշտոնների: Ինչո՞ւ չեք ձերբազատվում այդ գործելաոճից:

-Դեռ կան օղակներ, որտեղ աշխատում են նախկին կադրեր, որոնց փոխարինողների հարց կա և սխալ կլինի այդ համակարգը խարխլել:

–Խոսքս նոր նշանակումների մասին է:

-Նոր նշանակումների հետ կապված տեղեկություն չունեմ, բայց հնարավոր է՝ լինեն:

–Օրինակ՝ Արթուր Վանեցյանի բաջանաղը նշանակվեց Հանրային ծառայությունները կարգավորող հանձնաժողովի նախագահ:

-Չեմ կարծում, որ ոչ  պրոֆեսիոնալ մարդը…ներողություն, բայց այդ տեսանկյունից էլ պետք է նայել: Նախկինում նշանակվում էին մարդիկ, որոնց փոխարեն ամեն ինչ անում էին ներքին օղակների աշխատողները:

Հարցազրույցն ամբողջությամբ՝ տեսանյութում:

Շողիկ Գալստյան