Սահմանադրական փոփոխություններով ԱԱԾ-ն ու ոստիկանությունը մնում են վարչապետի ենթակայության տակ. Մակունցը չի հստակեցնում

Հայտարարությունն արել եմ, և ամեն ինչ այդ հայտարարության շրջանակում է: ԱԺ-ում այս մասին ասաց «Իմ քայլը» խմբակցության ղեկավար Լիլիթ Մակունցը՝ պատասխանելով Factor.am-ի հարցին, թե սահմանադրական փոփոխություններով ինչ են պատրաստում փոխել:

Դիտարկմանը, թե իր հայտարարությունից պարզ է դառնում, որ ԱԱԾ-ն և Ոստիկանությունը շարունակելու են մնալ վարչապետին առընթեր մարմիններ, Մակունցը հստակ պատասխան չտվեց. «Ասվածն այն հայտարարության մեջ է, ինչ ես ասացի»:

Հիշեցնենք, որ Ազգային ժողովի «Իմ քայլը» խմբակցության ղեկավար Լիլիթ Մակունցը և մի շարք այլ պատգամավորներ հանդես են գալու սահմանադրական փոփոխությունների գործընթաց նախաձեռնելու առաջարկությամբ: Մակունցն այս մասին հայտարարեց Ազգային ժողովի ապրիլի 18-ի նիստի ընթացքում:

«Պատասխանելով խորհրդարանական ընդդիմության կողմից բարձրացված խորհրդարանական վերահսկողության ամրապնդմանն ուղղված հարցադրումներին՝ հայտնում եմ, որ շուտով ես և «Իմ քայլը» խմբակցությունից մի շարք այլ պատգամավորների հանդես ենք գալու Սահմանադրական փոփոխություններ կատարելու գործընթաց նախաձեռնելու առաջարկությամբ, որի նպատակը, այլ հարցերի հետ մեկտեղ, լինելու է Կառավարությանը և վարչապետին ենթակա մարմինների ղեկավարներին ԱԺ հերթական նիստերին պատգամավորների հարցերին պատասխանելու հրավերը: Այսպիսով՝ այն, ինչ վերջին շրջանում բնութագրվել է որպես անհնար կամ մի բան, որին խորհրդարանական մեծամասնությունը դեմ է, ինչպես տեսնում եք՝ իրականությանը չի համապատասխանում: Եվ ուրեմն՝ չնայած Ազգային անվտանգության ծառայությանը, Ոստիկանությանը, Պետական եկամուտների կոմիտեին Ազգային ժողովի հարցուպատասխանին մասնակից դարձնելու ցանկությունը մեր ընդդիմադիր գործիչներինն էր, այս ուղղությամբ համատեղ աշխատանքների առաջարկը համարվեց անիրատեսական: Այդ պատճառով, կարևորելով նշված կառույցների հանրային հաշվետվողականությունը, մենք ինքներս ենք նախաձեռնելու նրանց Ազգային ժողով հրավիրելու համար անհրաժեշտ փոփոխություններ ձեռնարկելը»,- նշեց Մակունցը:

Մանրամասները՝ տեսանյութում: Նարեկ Կիրակոսյան