23.06.2026 | 23:30
Հայաստանի մի շարք հասցեներում էլեկտրաէներգիայի անջատումներ կլինեն
Գևորգ Պապոյանը ԵՄ դիվանագետների հետ քննարկել է հայկական արտադրանքի արտահանման ընդլայնման հնարավորությունները
Տնտեսություն
23.06.2026 | 20:28
ՀՀ էկոնոմիկայի նախարար Գևորգ Պապոյանը Հայաստանում հավատարմագրված ԵՄ և ԵՄ անդամ երկրների դիվանագիտական ներկայացուցիչների հետ հանդիպման ընթացքում քննարկել է Հայաստանի տնտեսական դիմակայունության ամրապնդման, հայկական արտադրանքի արտահանման ընդլայնման և առևտրի դյուրացման հարցերը։ Նախարարը նշել է, որ հայկական արտադրանքը համապատասխանում է եվրոպական բարձր չափանիշներին, իսկ բազմաթիվ տեղական ընկերություններ պատրաստ են խորացնել համագործակցությունը եվրոպացի գործընկերների հետ և մեծացնել արտահանման ծավալները։ Այս մասին տեղեկացնում են ՀՀ էկոնոմիկայի նախարարությունից:
«Քննարկվել են Հայաստանի տնտեսական դիմակայունության ամրապնդման և զարգացման ուղղությունները: Մասնակիցները կարևորել են հայկական արտադրանքի արտահանման հնարավորությունների ընդլայնման և առևտրի դյուրացման հարցերը։
Նախարար Գևորգ Պապոյանը նշել է, որ հայկական ապրանքները որակական առումով չեն զիջում եվրոպական շուկայում առաջարկվող ապրանքներին, համապատասխանում են ամենաբարձր ստանդարտներին՝ ունենալով համապատասխան «GLOBAL GAP» և մյուս բոլոր անհրաժեշտ սերտիֆիկատները․
«Մենք զգալի առաջընթաց ենք գրանցել բիզնես միջավայրի բարելավման և որակի չափանիշների բարձրացման գործում։ Այսօր շատ հայկական ընկերություններ պատրաստ են ոչ միայն ավելացնել իրենց արտահանումը, այլև հաստատել երկարաժամկետ գործընկերային հարաբերություններ եվրոպացի գնորդների հետ»,- ասել է նախարարը։
Անդրադարձ է կատարվել Եվրոպական միության անդամ և այլ երկրներ արտահանման աջակցության ծրագրերի ընթացքին, պետական աջակցության առկա գործիքակազմին։
Հանդիպման ավարտին նախարարը պատասխանել է դեսպանների հարցերին և ներկայացրել ոլորտի զարգացմանն ուղղված պետական քաղաքականությունն ու առաջնահերթությունները»,- ասվում է հաղորդագրությունում։
