22.10.2026 | 11:20
Բնապահպանների խնդիրները, նրանց պաշտպանության միջազգային և ներպետական մեխանիզմները. ՈՒՂԻՂ
Հայաստանում AI գործարան կառուցած Firebird-ի մասին է խոսել NVIDIA-ի ղեկավարը
Հաղորդաշարեր
22.10.2026 | 10:28
Բեռլինում անցկացվող NVIDIA GTC 2026 համաժողովում ընկերության հիմնադիր և գլխավոր գործադիր տնօրեն Ջենսեն Հուանգը արհեստական բանականության ենթակառուցվածքների զարգացման մասին ելույթում հիշատակել է Firebird ընկերությանը՝ որպես Կենտրոնական Ասիայում նոր ամպային հարթակ ստեղծող ընկերություն։ Firebird-ը ներկայացվել է նաև AI հաշվարկների վրա մասնագիտացած ամպային ընկերությունների շարքում։ Հայաստանում ընկերությունը գործարկել է արհեստական բանականության ենթակառուցվածք՝ NVIDIA Blackwell B200 շարքի 6,144 գրաֆիկական պրոցեսորով, իսկ ընդլայնման ծրագրով նախատեսվում է GPU-ների թիվը հասցնել շուրջ 70 հազարի։
Firebird-ի հաղորդագրությունը՝ ստորև․
«Բեռլինում անցկացվող NVIDIA GTC (GPU Technology Conference) համաժողովի իր ելույթում NVIDIA-ի հիմնադիր և գլխավոր գործադիր տնօրեն Ջենսեն Հուանգն անդրադարձել է արհեստական բանականության ենթակառուցվածքների ընդլայնմանը և այդ գործընթացում նոր ամպային ընկերությունների դերին։ Համաժողովին մասնակցում է նաև Firebird-ի պատվիրակությունը։
Հուանգը խոսել է տարբեր տարածաշրջաններում ստեղծվող AI գործարանների մասին՝ ընդգծելով, որ արհեստական բանականության մոդելների զարգացումը նախևառաջ պահանջում է համապատասխան հաշվարկային ենթակառուցվածք։ Այս համատեքստում նա հիշատակել է Firebird-ը՝ որպես Կենտրոնական Ասիայում նոր ամպային հարթակ ստեղծող ընկերություն։
Firebird-ի անունը տեղ է գտել նաև Հուանգի ներկայացման «Neoclouds» բաժնում՝ CoreWeave-ի, Nebius-ի, Lambda-ի և AI հաշվարկների վրա մասնագիտացած այլ ամպային ընկերությունների կողքին։
GTC-ն արհեստական բանականության ոլորտի կարևոր միջազգային հարթակներից է, որը համախմբում է տեխնոլոգիական ընկերությունների ղեկավարների, հետազոտողների և մշակողների՝ ներկայացնելու նոր տեխնոլոգիաներն ու դրանց կիրառման հնարավորությունները։
Firebird-ը զարգացնում է արհեստական բանականության գործարանների միջազգային ցանց։
Հայաստանում առաջին գործարանը գործարկվել է NVIDIA Blackwell B200 շարքի 6,144 գրաֆիկական պրոցեսորով։ Ընդլայնման ծրագրով նախատեսվում է ներդնել նաև NVIDIA Vera Rubin համակարգեր և GPU-ների ընդհանուր թիվը հասցնել շուրջ 70 հազարի։
Ընկերությունը նաև AI ենթակառուցվածք է զարգացնում Ղազախստանում և ուսումնասիրում է Նեպալում նման ծրագրի իրականացման հնարավորությունները։ Հայաստանում մեկնարկած այս նախագիծը նպաստում է երկրի դիրքի ամրապնդմանը արհեստական բանականության համաշխարհային տեխնոլոգիական քարտեզի վրա և տեղական ընկերությունների ու մասնագետների համար բացում միջազգային համագործակցության նոր հնարավորություններ»։
