13.11.2026 | 11:36
Microsoft-ի ծառայություններում գլոբալ խափանում է տեղի ունեցել
Microsoft-ի ծառայություններում գլոբալ խափանում է տեղի ունեցել
Հաղորդաշարեր
13.11.2026 | 11:36
Microsoft ընկերության ծրագրերից օգտվող տասնյակ հազարավոր մարդիկ բախվել են այնպիսի ծառայությունների աշխատանքի խափանումների, ինչպիսիք են Outlook-ը և Teams-ը։ France 24-ը գրում է, որ հինգշաբթի Microsoft-ի ծառայությունների աշխատանքը խափանվել է շուրջ 10 ժամով, քանի որ տեխնոլոգիական հսկան դժվարացել է լուծել որոշ սերվերների հետ կապված խնդիրները։ Խափանումն ազդել է ամբողջ աշխարհում գործող ընկերությունների և պետական կառույցների վրա, որոնք օգտվում են այդ հանրահայտ հարթակներից։
Microsoft-ը նախօրեին հայտնել է, որ Outlook-ի աշխատանքի խոշոր խափանումը վերացնելու ջանքերն ակնկալվող արդյունք չեն տալիս, ընկերությունը փորձում է գտնել այլընտրանքային լուծումներ։ Ամբողջ աշխարհում օգտատերերը զրկվել են ընկերության կարևոր ծառայություններից օգտվելու հնարավորությունից։
Մի քանի ժամ տևած խափանումը, որը Microsoft-ը կապել է իր ենթակառուցվածքների «ծանրաբեռնվածության աճի» հետ, ազդել է ինչպես էլեկտրոնային փոստի, այնպես էլ այնպիսի ծառայությունների վրա, ինչպիսիք են Teams-ը և արհեստական բանականության Copilot օգնականը։
Խափանման հետևանքները զգացվել են ամբողջ աշխարհում․ ընկերություններից մինչև պետական կառույցներ՝ օգտատերերը հայտնել են, որ չեն կարողանում հաղորդակցվել Outlook-ի միջոցով։
«Մենք հետևել ենք ծառայությունների աշխատանքը բարելավելու նպատակով իրականացված փոփոխությունների արդյունքներին և հաստատել, որ դրանք չեն տալիս ակնկալվող արդյունքը։ Մենք հայտնաբերում ենք աշխատանքային այլընտրանքային ուղղություններ, որոնք կարող են կիրառվել հզորություններն ավելացնելու համար»,- նշել է տեխնոլոգիական հսկան X-ում՝ չնշելով, թե երբ է ակնկալվում ծառայությունների լիարժեք վերականգնումը։
Խափանումը մեկ ժամվա ընթացքում տարածվել է ամբողջ աշխարհում՝ խաթարելով Microsoft-ի արտադրանքների աշխատանքը 74 երկրներում և տարածքներում, հաղորդում է խափանումներին հետևող Downdetector հարթակը։
Տուժած երկրներից է Նոր Զելանդիան, որի արտաքին գործերի նախարարությունը ծանուցում է տարածել՝ նշելով, որ «Microsoft-ի գլոբալ խափանման հետևանքով սահմանափակվել է էլեկտրոնային նամակներ ստանալու հնարավորությունը։ Սա վերաբերում է նաև ամբողջ աշխարհում Նոր Զելանդիայի բոլոր դեսպանատներին, հյուպատոսություններին և ներկայացուցչություններին»։
Սկզբում Microsoft-ը հայտնել էր, որ ուսումնասիրում է «Ամերիկա մայրցամաքում» խափանումների վերաբերյալ հաղորդումները, սակայն ավելի ուշ հաստատել է, որ խնդիրը, ըստ երևույթին, ազդել է «բոլոր տարածաշրջաններում գտնվող օգտատերերի՝ Microsoft 365 ծառայություններին միանալու հնարավորության վրա»։
Microsoft 365-ն ընկերության ամպային տեխնոլոգիաների վրա հիմնված բաժանորդագրային ծառայությունն է, որը ներառում է այնպիսի հայտնի հավելվածներ, ինչպիսիք են Outlook-ը և Teams-ը։
«Մենք պարզել ենք, որ մի շարք տարածաշրջաններում ենթակառուցվածքների մի հատվածը գերծանրաբեռնված է, ինչը, հավանաբար, նպաստում է կապի խափանումներին։ Մենք ակտիվորեն կիրառում ենք բոլոր հնարավոր միջոցները՝ խափանման ազդեցությունը նվազեցնելու համար»,- նշել է Microsoft-ը։
Առցանց խափանումներին հետևող Downdetector հարթակը ցույց է տվել, որ առավոտյան Վաշինգտոնում և Հոնկոնգում խափանումների վերաբերյալ օգտատերերի հաղորդումների թիվը կտրուկ նվազել է։
Microsoft-ը X-ում հրապարակել է մի շարք թարմացումներ՝ ներկայացնելով ծառայությունների լիարժեք աշխատանքը վերականգնելու շարունակվող, սակայն անհաջող փորձերը։ Հետագայում հրապարակված թարմացումներից մեկում Microsoft-ը հայտնել է, որ նկատվում է «սահմանափակ վերականգնում», քանի որ ընկերությունը փորձում է օգտատերերի հոսքը վերահասցեավորել խափանումից չտուժած սերվերներ։
Թարգմանությունը՝ Էմմա Չոբանյանի
