31.10.2026 | 10:43
Հայաստանի չեմպիոնը հաղթական խաղով է ավարտել պայքարը ֆուտզալի Չեմպիոնների լիգայում. ՏԵՍԱՆՅՈՒԹ
«Մեր նպատակն իրենց հողեր ադրբեջանցիների խաղաղ և արժանապատիվ վերադարձն ապահովելն է»․ Բաքվում «Արևմտյան Ադրբեջանի» թեմայով համաժողով է անցկացվել
Քաղաքականություն
17.11.2025 | 17:49
Միջազգային իրավունքը հիմք է «արևմտյան ադրբեջանցիների՝ իրենց պատմական հողեր վերադարձի համար»։ Այս մասին հայտարարել է «Արևմտյան Ադրբեջան» համայնքի նախագահ Ազիզ Ալեքբերլին Բաքվում անցկացված «Վերադարձի իրավունքը միջազգային խաղաղության և համագործակցության համատեքստում» միջազգային համաժողովի ընթացքում, որը նվիրված է եղել Ադրբեջանի «Սահմանադրության և ինքնիշխանության տարվան»։
Նա նշել է, թե հիմնական նպատակը մարդկանց «իրենց հողեր» խաղաղ, անվտանգ և արժանապատիվ վերադարձի ապահովումն է։
«Այս ոլորտում միջազգային կազմակերպությունների հետ համագործակցությունը մշտական ուշադրության կենտրոնում է։ Մենք մեր փաստաթղթերում հատուկ ընդգծել ենք, որ համայնքը հարգում է միջազգային իրավունքի բոլոր նորմերն ու սկզբունքները։ Միջազգային հանրությանը հայտնի է դարձել, որ մեր հայրենակիցների նկատմամբ հայերի կողմից կատարված հանցագործությունները հատել են բոլոր սահմանները։ Ցավոք, Հայաստանը ոչ միայն հրաժարվում է պատասխանատվություն կրել իր բոլոր հանցագործությունների համար, այլև մերժում է իրենց նախնիների հողերից վտարված ադրբեջանցիների վերադարձի իրավունքը։ Ադրբեջանի նյութական և մշակութային ժառանգությունը ոչնչացվել է հայերի կողմից։ Մենք այս հարցը ներկայացրել ենք բոլոր համապատասխան մարմիններին, այդ թվում՝ ՅՈՒՆԵՍԿՕ-ին։ Համայնքի անընդհատ կոչերին չնայած՝ Հայաստանը դրական արձագանք չի տվել այս հարցին»,- հայտարարել է Ալեքբերլին։
Նա նշել է, որ այս տարվա օգոստոսի 8-ին Վաշինգտոնում կայացած հանդիպումից հետո հայ հասարակությունը, քաղաքական գործիչները և լրատվամիջոցները սկսել են «կեղծ տեղեկություններ տարածել», թե Բաքուն հրաժարվել է, այսպես կոչված, «Արևմտյան Ադրբեջան» վերադառնալու գաղափարից։
«Նրանք նույնիսկ պնդում էին, որ Արևմտյան Ադրբեջանի համայնքը կդադարեցնի իր գործունեությունը, և այս ուղղությամբ բոլոր աշխատանքները կդադարեցվեն։ Սակայն Ադրբեջանի նախագահի ելույթը Գիտությունների ազգային ակադեմիայում հակառակն է վկայում։ Այսպիսով, հայերը չեն հասնի իրենց ցանկալիին»,- ասել է նա։
Ըստ ադրբեջանական լրատվամիջոցների՝ համաժողովն անցկացվել է, իբր, «Արևմտյան Ադրբեջանից բռնի տեղահանված անձանց՝ մարդու իրավունքների, միջազգային իրավունքի և տարածաշրջանային անվտանգության համատեքստում իրենց հայրենիք արժանապատվորեն վերադառնալու իրավունքի գիտական ուսումնասիրության և գնահատման համար»։
Բաքուն, այսպես կոչված, «Արևմտյան Ադրբեջանի» թեզն է առաջ մղում, որով փաթեթավորում է իր անհիմն ու կեղծ տարածքային պահանջները ՀՀ-ի նկատմամբ։ «Արևմտյան Ադրբեջան» ասելով՝ Ադրբեջանում ներկայացնում են ՀՀ տարածքը։ Օրերս այս թեմայով հերթական միջոցառումն էր կազմակերպվել։
Թարգմանությունը՝ Էմմա Չոբանյանի
