27.10.2026 | 23:30
Հայաստանի, Ադրբեջանի և Վրաստանի դեսպանները քննարկել են Հարավային Կովկասի խաղաղության և կայունության ամրապնդման հարցերը
Խուզարկություններ` Երևանի շուրջ 40 հասցեներում
Քաղաքականություն
20.02.2026 | 20:32
Մայրաքաղաքի շուրջ 40 հասցեներում խուզարկություններ են իրականացվում։ Այս մասին Factor.am-ին հայտնեցին ՆԳՆ ոստիկանությունից։
«ՆԳՆ Քրեական ոստիկանության ծառայողները Քննչական կոմիտեի գործընկերների հետ մայրաքաղաքի շուրջ չորս տասնյակ հասցեներում իրականացնում են խուզարկություններ»,– տեղեկացրեց ՆԳՆ մամուլի խոսնակ Նարեկ Սարգսյանը:
ՔԿ-ից էլ հայտնեցին, որ փետրվարի 18-ին Աջափնյակում տեղի ունեցած սպանության, սպանության փորձի, խուլիգանության, հրազենի ապօրինի շրջանառության դեպքերի առթիվ նախաձեռնված քրեական վարույթի նախաքննության ընթացքում իրականացվում են քննչական գործողություններ:
Առավոտյան հայտնել էինք, որ խուզարկություններ են իրականացվել նաև Արմավիրի մարզի շուրջ 20 հասցեներում։
Հիշեցնենք, որ փետրվարի 18-ին ժամը 16։00-ի սահմաններում կրակոցներ էին հնչել Երևանի Աջափնյակ թաղամասի Աբելյան փողոցում։ Միջադեպի հետևանքով յոթ վիրավոր հոսպիտալացվել էր, նրանցից մեկը հիվանդանոցում մահացել է։ Ավելի ուշ Քննչական կոմիտեից հայտնեցին, որ նախաձեռնվել է քրեական վարույթ՝ սպանության փորձի, սպանության, խուլիգանության և հրազենի, դրա հիմնական բաղկացուցիչ մասերի, ռազմամթերքի և այլ նյութերի, սարքերի, առարկաների ապօրինի շրջանառության հատկանիշներով: Կատարվում են անհետաձգելի քննչական գործողություններ:
Կրակոցների դեպքով նախաձեռնված քրեական վարույթի շրջանակում 1 անձի նկատմամբ հանրային քրեական հետապնդում է հարուցվել սպանության, խուլիգանության և հրազենի, դրա հիմնական բաղկացուցիչ մասերի, ռազմամթերքի և այլ նյութերի, սարքերի, առարկաների ապօրինի շրջանառության հոդվածների հատկանիշներով: Նրա մասով ձերբակալման որոշում է կայացվել։
