Վերադարձը «հայրենիք» մոտ է․ Ալիևի հրահանգից հետո Բաքուն «Արևմտյան Ադրբեջանի» հետ կապված հատուկ հանձնաժողով է ստեղծել 

Ադրբեջանի նախագահ Իլհամ Ալիևի՝ Արևմտյան Ադրբեջանի հարցի վերաբերյալ կոչից հետո, որը հնչեցվել է Ադրբեջանի Գիտությունների ազգային ակադեմիայի 80-ամյակին նվիրված իր ելույթում, ստեղծվել է հատուկ հանձնաժողով։ Այս մասին լրագրողներին հայտնել է, այսպես կոչված, «Արևմտյան Ադրբեջանի» համայնքի նախագահ Ազիզ Ալեքբերլին, գրում են ադրբեջանական լրատվամիջոցները։

«Ստեղծման օրվանից Արևմտյան Ադրբեջանի համայնքն աշխատել է Արևմտյան Ադրբեջանի մասին ճշմարտությունը միջազգային հանրությանը հասցնելու ուղղությամբ: Նախագահի կոչից հետո ստեղծվել է հատուկ հանձնաժողով: Մենք մոբիլիզացնում ենք մեր բոլոր ռեսուրսները՝ Արևմտյան Ադրբեջանին վերաբերող նախկինում անհայտ աղբյուրները բացահայտելու և ադրբեջանական ճշմարտությունը ավելի լայն համատեքստում ներկայացնելու համար»,- հայտարարել է նա:

«Այսօր արևմտյան ադրբեջանցիներն ավելի, քան երբևէ մոտ են իրենց պատմական հայրենիք վերադառնալուն»,- այս մասին էլ հայտարարել է Ադրբեջանի խորհրդարանի անդամ Հիքմեթ Բաբաօղլուն։

Նրա խոսքով, այսես կոչված, «արևմտյան ադրբեջանցիների»՝ իրենց հողեր վերադարձն արդիական է և անհրաժեշտ՝ ինչպես Ադրբեջանի Սահմանադրության, այնպես էլ միջազգային իրավունքի հիմնարար սկզբունքների շրջանակում։

«Միևնույն ժամանակ, աշխարհի տարբեր երկրներում ապրող բոլոր ադրբեջանցիների իրավունքների պաշտպանությունը, նրանց վերադարձն իրենց պատմական հողեր և մեր մշակույթի վերածնունդը մեր նախնիների կողմից մեզ կտակված տարածքում՝ յուրաքանչյուր ադրբեջանցու ցանկությունն ու իրավունքն է»,- ասել է Բաբաօղլուն։

Բացի այդ, կազմակերպվել է միջոցառում, որի ընթացքում քննարկվել են «Արևմտյան Ադրբեջանի» հարցի վերաբերյալ Իլհամ Ալիևի կողմից Ադրբեջանի Գիտությունների ազգային ակադեմիայի 80-ամյակի առթիվ արտահայտված ծրագրային գաղափարները՝ «Արևմտյան Ադրբեջանի» համայնքի ապագա գործունեության մեջ ներառելու համար։ Հանդիպման հիմնական նպատակն է եղել վերլուծել Իլհամ Ալիևի ելույթում արտահայտված գաղափարները և որոշել կազմակերպության ապագա գործունեությունը։

Ազիզ Ալեքբերովն ընդգծել է, որ այդ թեման հատուկ տեղ է զբաղեցնում նախագահ Իլհամ Ալիևի ելույթներում։

«Պետության ղեկավարն Արևմտյան Ադրբեջանի վերաբերյալ իր տեսակետներում միշտ կարևոր քաղաքական ուղերձներ է փոխանցում՝ պատմական արդարության վերականգնման և ադրբեջանցիների՝ իրենց հայրենիք խաղաղ վերադառնալու իրավունքի ապահովման տեսանկյունից»,- ասել է նա։

ավելենք, որ օրերս Բաքվում «Վերադարձ դեպի Արևմտյան Ադրբեջան» թեմայով հանրային քննարկում էր տեղի ունեցել։

Բաքուն, այսպես կոչված, «Արևմտյան Ադրբեջանի» թեզն է առաջ մղում, որով փաթեթավորում է իր անհիմն ու կեղծ տարածքային պահանջները ՀՀ-ի նկատմամբ։ «Արևմտյան Ադրբեջան» ասելով՝ Ադրբեջանում ներկայացնում են ՀՀ տարածքը։

Թարգմանությունը՝ Էմմա Չոբանյանի