Բաքվում, այսպես կոչված, «Արևմտյան Ադրբեջան» վերադարձի թեման են քննարկել

Այսօր Բաքվում Ոչ կառավարական կազմակերպությունների պետական ​​աջակցության գործակալության նախաձեռնությամբ  տեղի է ունեցել «Վերադարձ դեպի Արևմտյան Ադրբեջան» թեմայով հանրային քննարկում։ Ադրբեջանական լրատվամիջոցները հայտնում են, որ միջոցառման ընթացքում քննարկումներ են տեղի ունեցել երկրի նախագահ Իլհամ Ալիևի՝ Ադրբեջանի գիտությունների ազգային ակադեմիայում ունեցած ելույթի համապատասխան հատվածների շուրջ։

Հիշեցնենք, որ օրերս ակադեմիայում ունեցած ելույթում Ալիևը հրահանգել էր շարունակել ադրբեջանական պատմությունը տարածել՝ կրկին Հայաստանի հետ կապված պատմական կեղծիքներ հնչեցնելով։

Մասնավորապես, «Սիմուրգ» ադրբեջանական մշակութային ասոցիացիայի նախագահ, պրոֆեսոր Ֆուադ Մամեդովը նշել է, որ Ալիևի ելույթում ադրբեջանական ՀԿ-ների համար նոր խնդիրներ և մարտահրավերներ են բացահայտվում։

«Նույնիսկ հետհակամարտային ​​շրջանում նկատվում են Հայաստանի և հայկական սփյուռքի որոշակի ուժերի կողմից Ադրբեջանի պատմությունը կեղծելու փորձեր: Այս երեսպաշտությունը պահանջում է ավելի մեծ զգոնություն։ Ադրբեջանական ոչ կառավարական կազմակերպությունները պետք է ակտիվացնեն իրենց գործունեությունն Արևմտյան Ադրբեջանի թեմայի շուրջ։ Ադրբեջանցիների խաղաղ ճանապարհով վերադարձը Հայաստանի ներկայիս տարածք մարդու իրավունքների հիմնարար հարց է։ Գաղտնիք չէ, որ ադրբեջանական մշակույթն ունի լայն աշխարհագրություն, բայց ադրբեջանցիները երբեք չեն զբաղվել անջատողականությամբ, հակառակը, նրանք միշտ էլ զգալի ներդրում են ունեցել այն երկրների զարգացման գործում, որտեղ ապրել են»,- ասել է նա։

Ոչ կառավարական կազմակերպությունների պետական ​​աջակցության գործակալության գործադիր տնօրեն Այգուն Ալիևան հայտնել է, թե «Արևմտյան Ադրբեջան» թեմայի շուրջ ՀԿ-ների նախագծերի որակական և քանակական ցուցանիշներն աստիճանաբար աճում են։

Ադրբեջանի ազգային ՀԿ-ների ֆորումի տնօրենների խորհրդի անդամ Զաուր Իբրահիմլին էլ ասել է, թե Բաքվում առաջին անգամ հրատարակվել է 18-րդ դարի թուրքմեն հեղինակ Աբդուրազակ Նովրասի «Թարիխչեյի-Նովրես» աշխատությունը, որը նկարագրում է 1731 թվականի Երևանը։ Ըստ նրա՝ այն, իբր, վերահաստատում է, թե «Երևանի բնակչությունը ադրբեջանցի թյուրքերն են եղել, տեղանունները բացառապես ադրբեջանական են»։

Ադրբեջանի քարտեզագիրների հասարակական միավորման նախագահ Մուգաբիլ Բայրամովը, իր հերթին, ասել է, որ վերջին երկու տարիների ընթացքում պատրաստել են, այսպես կոչված, «Արևմտյան Ադրբեջանի» վերաբերյալ երկու քարտեզագրական աշխատանք։

«Մենք մեծ պահանջարկ ենք տեսել «Զանգեզուրի միջանցք» քարտեզի նկատմամբ, որը վերջերս հրատարակվել է ադրբեջաներեն և անգլերեն լեզուներով: Այս քարտեզը տարածվել է նաև հայկական լրատվամիջոցներում: Այս աշխատանքներում միշտ ներառված են մեր ազգային տեղանունները, և դրանց պատմական ճշգրտությունը կասկածից վեր է»,- հայտարարել է Բայրամովը:

Նշվում է, թե միջոցառումը քննարկվել են «Վերադարձ դեպի Արևմտյան Ադրբեջան» թեմայի տարբեր ասպեկտներ։

Բաքուն, այսպես կոչված, «Արևմտյան Ադրբեջանի» թեզն է առաջ մղում, որով փաթեթավորում է իր անհիմն  ու կեղծ տարածքային պահանջները ՀՀ-ի նկատմամբ։ «Արևմտյան Ադրբեջան» ասելով՝ Ադրբեջանում ներկայացնում են ՀՀ տարածքը։

Հավելենք, որ օրերս OC Media-ն հայտնել էր, որ իր ուսումնասիրած արտահոսած փաստաթղթերը բացահայտում են, թե ինչպես է Ադրբեջանի նախագահի աշխատակազմը համակարգել և ֆինանսավորել «Արևմտյան Ադրբեջան» նարատիվի միջազգային տարածումը։

Թարգմանությունը՝ Էմմա Չոբանյանի