14.09.2026 | 15:03
Իրանը կանչել է Ավստրիայի դեսպանին՝ Վիեննայում կայանալիք միջուկային համաժողովին իր պաշտոնյայի մասնակցությունը խոչընդոտելու համար
Անգլերենի համադպրոցական մրցույթ՝ «The Magic of English»․ ՏԵՍԱՆՅՈՒԹ
Տեսանյութեր
20.02.2026 | 21:22
Վերջին տարիներին կրթական ոլորտում հաճախ է հնչում նույն հարցը․ ինչպե՞ս սովորեցնել անգլերեն այնպես, որ այն չլինի միայն դասագրքային ու գնահատականի համար, այլ դառնա իրական հմտություն։ Այս հարցի պատասխաններից մեկը փետրվարի 20-ին ներկայացվեց հանրությանը՝ «Կորիզ» կրթական ծրագրի և Global Bridge կրթահամալիրի համագործակցությամբ մեկնարկած նոր համադպրոցական նախաձեռնության՝ «The Magic of English» անգլերենի մրցույթի շրջանակում։
Սա անգլերենի մրցույթ և ուսուցողական հարթակ է, որը նախատեսված է Հայաստանի հանրակրթական դպրոցների 3-9-րդ դասարանի բոլոր աշակերտների համար և հիմնված է միջազգային կրթական ծրագրերի վրա։
Նախաձեռնության նպատակն է ստեղծել կրթական նոր ուղի Հայաստանի հանրակրթական դպրոցների աշակերտների համար՝ անկախ նրանց առաջադիմությունից։
«Մենք միասին ուզում էինք ստեղծել այնպիսի մշակույթ, որ անգլերեն սովորելը լինի խաղի, ժամանցի ուրախ տարբերակ, որ յուրաքանչյուր 3-9-րդ դասարանցի կարողանա կրթվել, սովորել և մասնակցել մրցույթի։ Իսկ այդ ամենը կեզրափակվի «Կորիզի»՝ հայտնի դարձած շոու-մրցանակաբաշխության շրջանակներում»,- նշում է «Կորիզ» կրթական ծրագրի հիմնադիր, նախագահ Սուրեն Ալոյանը։
«The Magic of English»-ն օլիմպիադա չէ՝ միայն գերազանց առաջադիմությամբ աշակերտների համար․ մրցույթը բոլոր աշակերտների համար է՝ անկախ լեզվի տիրապետման նախնական մակարդակից։ Սովորողը կարող է աճել քայլ առ քայլ՝ բարելավելով անգլերենի գիտելիքները։
«Այսօր անգլերենը պարզապես պարտադիր առարկա չէ, այն լեզու է, որով աշակերտը ճանաչում է աշխարհը, բացահայտում է տարբեր մշակույթներ, շփվում է իր հասակակիցների հետ՝ տարբեր երկրներից, և կարողանում է վստահորեն արտահայտել իր մտքերը։ Մենք ստեղծել ենք մի հարթակ, որտեղ երեխան չի վախենում սխալվելուց, այստեղ սխալը չի նույնացվում ցածր գնահատականի հետ, այն աճի բնական քայլ է»,- շեշտում է Global Bridge կրթահամալիրի հիմնադիր, տնօրեն Աննա Հարությունյանը։
Մանրամասները՝ տեսանյութում։
Աննա Բաբաջանյան
