06.11.2026 | 01:59
Եվրոպա լիգա. «Արարատ-Արմենիան» ցավալի պարտություն կրեց Պորտուգալիայում. ՏԵՍԱՆՅՈՒԹ
Հղի կնոջ և չծնված երեխայի մահից 3 տարի անց մեղավորները պատժված չեն․ ինչու է գործը ձգձգվում․ ՏԵՍԱՆՅՈՒԹ
Հասարակություն
25.04.2025 | 21:30
29-ամյա Սոնա Մնացականյանի և նրա չծնված փոքրիկի մահից 3 տարի անց որևէ մեկն այդպես էլ չի պատժվել ողբերգական պատահարի համար։
2022 թվականի ապրիլի 26-ն էր, երբ վարչապետ Նիկոլ Փաշինյանի ավտոշարասյան անցնելու համար հերթական անգամ փակվել էր Պարոնյան-Լեո փողոցը։ Մնացականյանը դժբախտություն ունեցավ փողոցը հետիոտնային անցումով հատել հենց այն պահին, երբ արագությունը գերազանցելով՝ սլանում էր վարչապետին ուղեկցող մեքենաներից մեկը․ ոստիկանության մայոր Արամ Նավասարդյանի վարած մեքենան մահացու վրաերթի ենթարկեց Մնացականյանին։ Պատահարից հետո ո՛չ նա, ո՛չ ուղեկցող մյուս մեքենաների, ո՛չ էլ Փաշինյանի վարորդը չկանգնեցրին մեքենաները։ Իրավապաշտպանը նշում է՝ Փաշինյանի իշխանության առաջին տարիներին ամեն ինչ այլ կերպ էր։
Պատահարից շատ չանցած ՀՀ վարչապետի աշխատակազմի ղեկավարի տեղակալ Տարոն Չախոյանը շտապեց գրել, որ վրաերթի վայրի մոտով անցնելիս, մեքենայից նկատելով ընկած կնոջը, վարչապետը հրահանգել է շտապօգնություն կանչել։ Այնինչ, օրեր անց այդ ժամանակ Մարդու իրավունքների պաշտպանի պաշտոնը զբաղեցնող Քրիստիննե Գրիգորյանն այլ բան էր պնդում։
Եթե անգամ սեփական աչքով չի տեսել պատահարը, արդյո՞ք տեղում չեն զեկուցել․ թեև այս հարցի պատասխանը շարունակում է մնալ անորոշ, այնուամենայնիվ, փաստ է, որ վարչապետի կամ նրան ուղեկցող մեքենաներից որևէ մեկը չի կանգնել և օգնություն չի ցուցաբերել քաղաքացուն։ Փոխարենը, Փաշինյանը հաջորդ օրը զանգել է մահացած կնոջ հորը՝ Մնացական Մնացականյանին։
Իսկ նորմալ ավարտը, կարծես, այդքան էլ մոտ չէ․ ողբերգական դեպքից 3 տարի անց գործը դեռևս դատաքննության փուլում է, իսկ նիստերը մեկը մյուսի հետևից հետաձգվում են։
Ավելին, տուժող կողմը բարձրաձայնում է ոչ պատշաճ քննություն իրականացնելու մասին․ գործով կարևոր ապացույցներ են ոչնչացվել, չկա ոստիկանների ռադիոկապի խոսակցության ձայնագրությունը, ահազանգ են հնչեցնում նրանք։
Մեկ ամիս առաջ ընդդիմությունը Փաշինյանից հետաքրքրվեց՝ ինչո՞ւ է դանդաղում գործի քննությունը։ Ի պատասխան՝ վարչապետը փորփրեց հեռախոսը՝ նշելով, որ ինքն ու տուժող կողմը վերջին անգամ իրար հետ զրույց են ունեցել 2022 թվականի հունիսին։
Երկու կյանք խլած ողբերգական դեպքով ամբաստանյալի աթոռին է մեկ անձ՝ «Ճանապարհային ոստիկանություն» ծառայությանն ուղեկցող սպայական վաշտի հրամանատար Աշոտ Նավասարդյանը։ Վերջինս 3 տարվա ընթացքում որևէ օր չի անցկացրել անազատության մեջ, ավելին՝ կասեցված չեն նաև նրա լիազորությունները։ Պաշտպանական կողմը պնդում է՝ անզգույշ պատահար է եղել։
Իրավապաշտպան Զարուհի Հովհաննիսյանը շեշտում է՝ մեղավոր են նաև պահպանություն իրականացնող և երթևեկությունը հսկող ծառայողները։
Ուշագրավ է, որ դեռևս նախորդ տարի Վերաքննիչ դատարանը բավարարել էր պաշտպանական կողմի բերած բողոքը և արձանագրել՝ խախտվել են տուժողի իրավահաջորդի իրավունքները։
Երիտասարդ կնոջ և նրա չծնված երեխայի մահից 3 տարի անց փաստացի դատավճիռ չկա, տուժող կողմը շարունակում է ահազանգել անարդար քննության մասին, իսկ պատասխանատու օղակները շարունակում են լռել։
Մանրամասները՝ տեսանյութում։
Ռոզա Վարդանյան
