Ինչ տվեց Փաշինյանի այցը Մոսկվա․ ՀՀ վարչապետը չի հանդիպել որևէ ղեկավարի հետ. ՏԵՍԱՆՅՈՒԹ

Երկօրյա այցով Մոսկվա մեկնած Նիկոլ Փաշինյանն այդպես էլ երկկողմ հանդիպում չունեցավ ո՛չ Վլադիմիր Պուտինի, ո՛չ էլ ՌԴ ժամանած այլ երկրների ղեկավարների հետ։ Այնինչ, մինչ մայիսի 9-ի այցը, ի պատասխան քննադատությունների, նա ակնարկել էր՝ նպատակներից մեկը հենց դա է։

Թե առիթն օգտագործելով՝ ում հետ է Փաշինյանը երկկողմ օրակարգին առնչվող հարցեր քննարկել, պաշտոնական տեղեկություն չի հրապարակվում։ Վարչապետի խոսնակ Նազելի Բաղդասարյանը Factor TV-ին տեղեկացրեց, որ երկկողմ հանդիպումներ նախատեսված չեն եղել։

Խորհրդարանական ՔՊ խմբակցության պատգամավոր Հասմիկ Հակոբյանն այսօր պատասխանելով Factor TV-ի հարցին՝ ասաց, թե հանդիպման որոշումը կախված չի եղել միայն Հայաստանի ղեկավարից։ Վարչապետի թիմակիցը մխիթարվում է ոչ ֆորմալ շփումներով։

Մայիսի 9-ի տոնակատարություններին մասնակցելուց հրաժարվել և ՌԴ չէր մեկնել Ադրբեջանի նախագահը։ Արդյո՞ք Փաշինյանը Մոսկվա էր գնում Ալիևի հետ հանդիպելու մտադրությամբ։

Քաղաքական մեկնաբան Հակոբ Բադալյանի խոսքով՝ պաշտոնական Մոսկվան չէր էլ կարող այդ օրերին զբաղվել հայ-ադրբեջանական հարաբերությունների կարգավորման շուրջ հանդիպումներ կազմակերպելով, քանի որ կենտրոնացած էր Չինաստանի հետ համագործակցության փաստաթղթերի ստորագրումը նախապատրաստելով։

Հակոբ Բադալյանը դժավարանում է ասել՝ Նիկոլ Փաշինյանի մոսկովյան այցն առանց հանդիպումների կարելի է տապալվա՞ծ համարել, թե՞ ոչ, քանի որ չկար նախապես հայտարարված ծրագիր։

Ազգային Ժողովի «Պատիվ ունեմ» խմբակցության ղեկավար Հայկ Մամիջանյանի կարծիքով՝ Փաշինյանը սեփական խնդիրները լուծելու համար էր գնացել Մոսկվա։

Թե ինչու Պուտին-Փաշինյան հանդիպում տեղի չի ունեցել, Մամիջանյանը խուսափում է գնահատականներ տալ՝ միաժամանակ շեշտելով, որ Հայաստանի և Ռուսաստանի հարաբերությունները վատ մակարդակում են։ Անդրադառնալով վարկածին, որ Փաշինյանը Մոսկվա էր մեկնել Ալիևի հետ բանակցելու հույսով, ընդդիմադիր պատգամավորը նշում է՝ դա, միևնույն է, ՀՀ-ի համար օգտակար չէր լինելու։

Նշենք, որ Փաշինյանի և Ալիևի միջև վերջին երկկողմ հանդիպումը տեղի է ունեցել նախորդ տարի հոկտեմբերին Կազանում, որից հետո նախ՝ Հայաստանի, ապա՝ Ադրբեջանի նախագահները հրամանագրերով վավերացրեցին հայ-ադրբեջանական սահմանազատման հանձնաժողովների կանոնակարգը։

Մանրամասները՝ տեսանյութում։

Նարեկ Կիրակոսյան