Կճոյանը պետությանը գույք չի վերադարձնի․ դատարանը մերժել է դատախազության հայցապահանջը

Նավասարդ արքեպիսկոպոս Կճոյանից ենթադրյալ ապօրինի ծագման գույքը պետականացնելու հայցապահանջը Հակակոռուպցիոն դատարանը մերժել է և վարույթ չի ընդունել։ Այս մասին Factor.am-ը տեղեկանում է դատարանի որոշումից։ ՀՀ գլխավոր դատախազության ապօրինի ծագում ունեցող գույքի բռնագանձման գործերով վարչությունն էր նման հայց ներկայացրել դատարան։

Հիշեցնենք՝ 2023 թվականի հունվարին հայտնի դարձավ, որ Գլխավոր դատախազությունն ուսումնասիրում է Արարատյան հայրապետական թեմի առաջնորդ Նավասարդ արքեպիսկոպոս Կճոյանին պատկանող գույքի օրինականությունը, նրան հրավիրել էին ապօրինի ծագում ունեցող գույքի բռնագանձման գործերով վարչություն։ Թե Կճոյանի ո՞ր գույքերն էին ապօրինի համարվում, գերատեսչությունը չէր հստակեցրել։

Կճոյանի անունը տարիներ առաջ կապվում էր մի կոռուպցիոն պատմության հետ։ Խոսքը մեծ աղմուկ բարձրացրած Կիպրոսի օֆշորային սկանդալի մասին է։ Դրա կիզակետում էր հայտնվել նաև նախկին վարչապետ Տիգրան Սարգսյանը։ Շուրջ 6 տարի առաջ տվյալ գործով 16 տարվա ազատազրկման դատապարտվեց Աշոտ Սուքիասյանը, որը քավոր-սանիկական հարաբերություններ մեջ է եղել Կճոյանի հետ։ Սուքիասյանը 2020-ին պատժի մեղմացման արդյունքում ազատ արձակվեց։ Այս քրեական գործով 2022-ին Նավասարդ արքեպիսկոպոս Կճոյանն էլ արդարացվեց։

Կճոյանը լայն հանրությանը հայտնի էր դարձել նաև շուրջ 200 հազար դոլար արժողությամբ «Բենթլի»-ով, որն, ըստ մամուլի հրապարակումների, նվեր էր ստացել։ Այս տեղեկությունն անուղղակի հաստատել էր նաև Ամենայն հայոց կաթողիկոսը։ «Իմ կողքին կանգնած է Նավասարդ սրբազանը։ Նա «Բենթլի» ավտոմեքենա է նվեր ստացել, որը հետագայում վաճառել է, գումարը նվիրել կարիքավորներին»,– ասել էր Գարեգին Բ-ն՝ չհստակեցնելով, թե մասնավորապես ո՞ւմ է օգնել Կճոյանը։

Վերադառնալով Նավասարդ արքեպիսկոպոս Կճոյանի ենթադրյալ ապօրինի ծագման գույքերին և դրանց բռնագանձման հայցապահանջի մերժմանը․ հարց է առաջանում՝ արդյո՞ք բարձրաստիճան հոգևորականի գույքն իսկապես ձեռք է բերվել արդար վաստակով, թե՞ իշխանությունները չեն կարողանում լիարժեք կատարել թալանվածը հետ բերելու՝ ընտրողներին տրված խոստումը։

Նարեկ Կիրակոսյան