«Խախտումները բավականաչափ շատ էին»․ ո՞վ է հայտնվել ԻԱԿ-ի սև ցուցակում․ ՏԵՍԱՆՅՈՒԹ

Սեպտեմբերի 28-ին նշվում է Տեղեկատվության ազատության միջազգային օրը, որին ընդառաջ Ինֆորմացիայի ազատության կենտրոնն (ԻԱԿ) այսօր կազմակերպել էր քննարկում «Տեղեկատվության ազատություն. Էլեկտոնային հարցումների միասնական հարթակ հնարավորությունները և խնդիրները» թեմայով։

Էլեկտոնային հարցումների միասնական հարթակը՝ E-request-ը, գործարկվել է 2018 թ-ին։ ԷԿԵՆԳ ՓԲԸ-ի ծրագրերի կառավարման բաժնի պետ Արաքս Ավետյանի խոսքով՝ այն 2019 թ-ից հանձնվել է ԷԿԵՆԳ-ի սպասարկմանը․ «Քաղաքացիների համար սա դարձել է առօրյա գործիք, որի միջոցով կարողանում են շփում հաստատել պետության հետ։ Ավելի քան 1 մլն նամակ ուղարկվել է հարթակի միջոցով»։
Ինֆորմացիայի ազատության կենտրոնը E-request-ի նախաձեռնողներից է։ Ըստ ԻԱԿ-ի ծրագրերի համակարգող Լիանա Դոյդոյանի՝ այն պետք է հեշտացներ պետական մարմիններին լրագրողների կողմից հարցումների ուղարկումն ու պատասխանների ստացումը, սակայն ներկայում լրագրողների միայն 11%-ն է օգտագործում այդ հարթակը։

«Տարեցտարի փորձում ենք բարելավել հարթակը այնպես, որ օգտագործողները շատանան»,- նշեց Դոյդոյանը։
ԻԱԿ-ը հրապարակել է նաև տեղեկատվության ազատության խախտումների «Սև ցուցակը» 2024 թ-ի սեպտեմբերի դրությամբ։ Ըստ այդմ՝ օրենքի ուղղակի խախտում են թույլ տվել Գյումրու համայնքապետ Վարդգես Սամսոնյանը, Ներքին գործերի նախարար Վահե Ղազարյանը, Երևանի Կենտրոն վարչական շրջանի ղեկավար Սամվել Ղուկասյանը, ԿԳՄՍ նախարար Ժաննա Անդրեասյանը, Արտաքին գործերի նախարար Արարատ Միրզոյանը։

«9 ամիսների ընթացքում մոտ 500 հարցում միայն ԻԱԿ-ն է ուղարկել։ Խախտումները բավականաչափ շատ էին, հատկապես ժամկետների հետ կապված»,-  նշեց Դոյդոյանը։

Մանրամասները՝ տեսանյութում։