Մանկապարտեզ ընդունվելն ավելի դժվար է, քան համալսարան. ի՞նչ են ասում պատասխանատուները. ՏԵՍԱՆՅՈՒԹ

Ներկայումս Երևանի քաղաքապետարանի ենթակայությամբ գործում է 160 մանկապարտեզ, որից 8-ը իրականացնում է ներառական կրթություն: Մանկապարտեզ հաճախող երեխաների ծնողները փաստի առաջ կանգնեցին, հատկապես, երբ 2017-ին Երևանի քաղաքապետարանը հերթական տհաճ անակնկալը մատուցեց:

Նոր որոշման համաձայն, եթե երեխայի ծնունդը լրանում է մինչև սեպտեմբերի 9-ը, կարող է սեպտեմբերի 1-ից հաճախել մանկապարտեզ, եթե դրանից հետո, ապա՝ ոչ: Նախակրթական տարիքը սկսվում է 0-3 տարեկանից, բայց նոր օրենքի համաձայն՝ մանկապարտեզները սկսում են երեխաներին հերթագրել 3 տարեկանից: Հասմիկ Անդրեասյանը միայնակ մայր է, երեխան արդեն երկուսուկես տարեկան է, բայց հերթագրել է դեռ 1 տարեկան հասակից: Իր խոսքերով՝ հայտնվել է անելանելի վիճակում:

«Մանկապարտեզի տնօրենի բազմաթիվ հավաստիացումներից ելնելով երեխաս պետք է սեպտեմբերից արդեն հաճախեր պետական մանկապարտեզ, սակայն քաղաքապետարանի նոր որոշման համաձայն, առաջնահերթությունը տրվում է ավելի բարձր տարիքի երեխաների, որոնք վաղուց հերթի մեջ են, ի հաշիվ կրտսեր խմբերի: Ուզում եմ հասկանալ, այդ տենդենցը ո՞ւր է գնում, եթե մենք նպաստում ենք ծնելիությանը, մեր երեխաների զարգացմանը, ինչո՞ւ են սահմանափակում այդ իրավունքը` երեխայի նախակրթարան հաճախելու»,- դժգոհում է ծնողը։

Նրա խոսքով՝ պետական աշխատող լինել դեռ չի նշանակում բավականաչափ եկամուտ ունենալ և կարողանալ երեխային ընդունել վճարովի մանկապարտեզ. «Համոզված եմ, որ բոլոր ծնողները կկիսեն այդ կարծիքը, թե ինչքան դժվար է, մինչև 3 տարեկան երեխայից ծնողը բաժանվում է, գնում է փող աշխատելու, ապրուստ հայթայթելու համար: Եվ այսօրվա դրությամբ կանգնած ես փաստի առաջ, որ այդ հայթայթածդ ապրուստից որոշակի մեծ գումար հատկացնես երեխայի մանկապարտեզի համար, երբ որ քո երեխան ունի այդ իրավունքը՝ անվճար մանկապարտեզ հաճախելու»։

Աննա Կարապետյանն արդեն 2 տարի է ջանք չի խնայում 4-ամյա որդուն մանկապարտեզ ընդունելու համար: Արդեն 5 տարբեր մանկապարտեզ է դիմել: «Մտա 3-րդ մանկապարտեզ, որտեղ ինձ ասացին. եթե հերթագրվելու համար եք, և ձեր բալիկը արդեն 2 տարեկան է, դուք շատ ուշ եք եկել, հերթագրվելու իմաստ չկա: Եվ այս բառերով նրանք ինձ ուղեկցեցին դուրս»,- պատմում է նա։

Չնայած այս պատասխանին Աննան այնուամենայնիվ որոշել է հերթագրել երեխային և սպասել: Ամիսներ անց, երբ կրկին դիմել է ճշտելու՝ արդյոք հերթը կհասնի՞ իր երեխային, թե՝ ոչ, լսել է նույն պատասխանը՝ բացառված է:

3-րդ մանկապարտեզի տնօրեն Ժաննա Թադևոսյանը մեզ հետ զրույցում պարզաբանեց․ «Մենք շարժվում ենք օրենքով, և դուք շատ լավ գիտեք, որ 2011 թվականից արդեն օրենքը գործում է, թե ինչպիսի խտություն պիտի ունենան մեր տարիքային խմբերը: Ամեն խմբում 33 երեխա, լրացավ այդ 33-ը, հնարավոր չի, մենք ավել երեխա չենք կարող ընդունել»։

Տիկին Թադևոսյանի խոսքով՝ օրենքը անկատար է, և իրենք այս հարցում ոչինչ չեն կարող անել. «Ինձ մոտ կա 250 երեխայի լիցենզիա, որից նախադպրոցական տարիքի 70 երեխա է, մնացածը գալիս են միջին և կրտսեր խմբերը: Լիցենզիայից ավել մենք չենք կարող ավել երեխա ունենալ, ուստի ծնողը պետք չէ, որ միշտ ըմբոստանա»։

Ծնողը ստիպված դիմել է մեկ այլ մանկապարտեզ, որտեղից շուտով արձագանքել են. «21 մանկապարտեզում 26 ձևը վերցնելուց հետո մեզ ասացին, որ օրենքը փոխվել է օգոստոսի 29-ին, և որ երեխայի 3 տարեկանը սեպտեմբերի 1-ին չի լրացել, լրանալու է 15-ին, այդ իսկ պատճառով մենք պիտի նորից հերթ պահենք»։

Այս դեպքից հետո էլ Աննան կրկին դիմել է մեկ այլ մանկապարտեզ, որտեղ, իր խոսքերով՝ իրեն դարձյալ խաբել են։

Մանրամասները՝ տեսանյութում։

Անի Մնացականյան