Փաշինյանը իր հետ քահանա՞ է տանում Գյումրի․ Շիրակի թեմում բոյկոտում են վարչապետի գաղափարը․ ՏԵՍԱՆՅՈՒԹ

«Կիրակի օրերը գնում եմ, ծնկի եմ գալիս ու մեղքերիս համար թողություն եմ խնդրում»,- նոյեմբերի 20-ին կառավարության նիստից հետո լրագրողների հետ զրույցում ասել էր Նիկոլ Փաշինյանը։

Փաշինյանն այս կիրակի ծնկի կգա ու մեղքերի համար թողություն կխնդրի Գյումրիի առաջնորդանիստ Սուրբ Աստվածածին՝ Յոթ Վերք եկեղեցում։

Ո՞ր քահանայի օգնությամբ է Փաշինյանն այս կիրակի մեղա գալու։ Շիրակի թեմի քսանից ավելի հոգևորականներ հրաժարվել են վարչապետի սցենարով պատարագ մատուցել։ Փաշինյանի ցանկությունն է, որ պատարագիչն արարողության ընթացքում չհիշատակի Ամենայն հայոց Գարեգին երկրորդ կաթողիկոսի անունը։ Փաշինյանն այս հարցում գործի է դրել նաև իր ենթակայությամբ գործող ԱԱԾ-ն։

Արթիկի թեմի առաջնորդ, Միքայել արքեպիսկոպոս Աջապահյանի կալանավորվելուց հետո նաև Շիրակի թեմի առաջնորդի պարտականությունները ստանձնած Նարեկ եպիսկոպոս Ավագյանը Factor TV-ին ասաց՝ անհայտ է, թե ով է պատարագելու Սուրբ Աստվածածին եկեղեցում։ Շիրակի թեմի հոգևորականները հրաժարվել են զեղչել կաթողիկոսի անունը։

«Ինձ ոչ մի բան չի ասվել։ Շիրակի թեմից էլ ոչ մեկ չի պատարագելու։ Յոթ Վերքում պետք է պատարագեր Տեր Գառնիկը։ Իր առաջին պատարագներ էր, բայց նա պատարագ կմատուցի Սուրբ Ամենափրկիչ եկեղեցում»,-ասաց Նարեկ եպիսկոպոս Ավագյանը։

Այս կիրակի Սուրբ Աստվածածին եկեղեցում նախատեսված էր Շիրակի թեմի քահանա տեր Գառնիկ Ավոյանի անդրանիկ պատարագը։ Քահանան Factor TV-ին փոխանցեց՝ ինքն արարողությունն անցկացնելու է Յոթ Վերքից ոչ հեռու գտնվող Սուրբ Ամենափրկիչ եկեղեցում։

 «Պետք է Յոթ Վերքում պատարագ մատուցեի, էլ չեմ մատուցելու։ Առաջնորդից հրաման ունեմ, որ պատարագը Սուրբ Ամենափրկիչում պետք է մատուցում։ Հրաման է, պետք է այդպես անեմ, ինձ թվում է՝ պարզ է։ Հավանաբար վարչապետի այցով պայմանավորված»,-ասաց քահանան։

Տեր Գառնիկ քահանա Ավոյանը Factor TV-ին փոխանցեց, որ պատրաստ է պատարագ մատուցել, սակայն կաթողիկոսի անունը չի զեղչի։  «Եթե ես լինեի պատարագիչը կաթողիկոսի անունը միանշանակ հիշատակելու էի։ Երևի իրենք չեն համաձայնվել, որ ես պատարագեմ։ Իրենք զոռովից մտել են Յոթ Վերք, ի՞նչ կարող ենք անել։ Ոչ մեր թեմի քահնաներից է լինելու, ոչ սարգավակներից, ոչ դպիրներից»,-ասաց նա։

Այս շաբաթվա ընթացքում, այդ թվում՝ ԱԱԾ-ի ազդեցությամբ, իշխանավորները փորձում էին հասնել նրան, որ Գյումրիի քահանաներից տեր Ռուբեն Գասպարյանը մատուցի պատարագը՝ կաթողիկոսի անունը զեղչելով։ Ո՛չ նրա, ո՛չ էլ թեմի այլ քահանաների հարցում Փաշինյանի թիմակիցները հաջողության չեն հասել։ Տեղեկություններ կան, որ Նիկոլ Փաշինյանն իր հետ այլ թեմից է քահանա տանում Գյումրիի եկեղեցի։ Շիրակի թեմից տեր Նշանն էլ է ասում՝  նման տեղեկություններ լսել է։

Վարչապետի աշխատակազմից նույնպես հնարավոր չեղավ ճշտել, թե ով է պատարագ մատուցելու կիրակի օրը։ Մեր զանգերն անպատասխան մնացին։ 

Մանրամասները՝ տեսանյութում։

Նարեկ Կիրակոսյան